படம் தயாராகிறது… Generating image…
அரசு மருத்துவமனைகளில் குழந்தைகள் பிறப்பை ஊக்குவிக்கும் நோக்கில், ‘தாய்மாமன் தங்க மோதிரம்’ திட்டத்தை கடந்த ஜூன் 23-ந் தேதி முதல்-அமைச்சர் ஜோசப் விஜய் அறிவித்தார். அண்ணா பிறந்த நாளான செப்டம்பர் 15-ந் தேதி இந்த திட்டம் தொடங்கப்படும் என்றும் அப்போது தெரிவிக்கப்பட்டது. கடந்த ஜூன் 22-ந் தேதி முதல் அரசு மருத்துவமனைகளில் பிறக்கும் குழந்தைகள் இத்திட்டத்தின் கீழ் பயன்பெற தகுதியுடையவர்கள் என அறிவிக்கப்பட்டுள்ளது. தகுதியான குழந்தைகளுக்கு தாய்மாமன் சீராக 22 கேரட் தங்கத்தில் தயாரிக்கப்பட்ட ஒரு கிராம் எடையுள்ள தங்க மோதிரம் வழங்கப்பட உள்ளது. இத்திட்டத்துக்காக அடுத்த ஓராண்டுக்கு ரூ.755 கோடியே 83 லட்சம் நிதி பட்ஜெட்டில் ஒதுக்கப்பட்டுள்ளது. மேலும், 4 லட்சத்து 41 ஆயிரத்து 667 தங்க மோதிரங்கள் தயாரிக்க ஆர்டர் வழங்கப்பட்டுள்ளது. இதில் 70 சதவீத மோதிரங்களை தயாரிக்கும் ஒப்பந்தத்தை ஜாய் ஆலுக்காஸ் நிறுவனமும், 30 சதவீத ஒப்பந்தத்தை கல்யாண் ஜூவல்லரி நிறுவனமும் பெற்றுள்ளன. இந்நிலையில், திட்டம் தொடங்கப்படுவதாக அறிவிக்கப்பட்டுள்ள செப்டம்பர் 15-ந் தேதிக்கு இன்னும் 5 நாட்களே உள்ள நிலையில், அன்றைய தினம் திட்டம் தொடங்கப்பட வாய்ப்பில்லை என தகவல்கள் வெளியாகியுள்ளன. இதற்கு முதல்-அமைச்சர் ஜோசப் விஜய்யின் லண்டன் பயணமே காரணமாக கூறப்படுகிறது. தொழில் முதலீடுகளை ஈர்க்கும் நோக்கில் அவர் நாளை (வியாழக்கிழமை) லண்டன் புறப்பட உள்ளார். சென்னையில் இருந்து துபாய் சென்று, அங்கிருந்து லண்டன் செல்லும் அவர், அங்கு 7 நாட்கள் தங்கியிருந்து 16-ந் தேதி வரை பயணத்தை மேற்கொள்வார் என கூறப்படுகிறது. இந்த பயணத்தின் போது, சில்வர்ஸ்டோனில் நடைபெற உள்ள நடிகர் அஜித்குமாரின் கார் பந்தயத்தையும் முதல்-அமைச்சர் ஜோசப் விஜய் நேரில் பார்வையிட இருப்பதாக தகவல் வெளியாகியுள்ளது. இதனால், செப்டம்பர் 16-ந் தேதி இரவுதான் அவர் லண்டனில் இருந்து சென்னை திரும்பும் நிலை ஏற்படும் என கூறப்படுகிறது. அப்படியானால், அதற்கு முந்தைய நாளான செப்டம்பர் 15-ந் தேதி அண்ணா பிறந்த நாளில் ‘தாய்மாமன் தங்க மோதிரம்’ திட்டத்தை தொடங்கி வைப்பது சாத்தியமில்லை என தெரிகிறது. இந்த நிலையில், மதுரை மாவட்டம் உசிலம்பட்டியில் உள்ள அரசு மருத்துவமனையில் செப்டம்பர் 25-ந் தேதி (வெள்ளிக்கிழமை) இத்திட்டத்தை முதல்-அமைச்சர் ஜோசப் விஜய் தொடங்கி வைக்க இருப்பதாக தகவல்கள் வெளியாகியுள்ளன. உசிலம்பட்டி பகுதியில் தாய்மாமன் சீர் வழங்கும் நடைமுறை பிரபலமாக இருப்பதால், திட்டத்தை தொடங்கும் இடமாக அந்த பகுதி தேர்வு செய்யப்பட்டுள்ளதாக தெரிகிறது. இதனிடையே, லண்டன் பயணத்தை முடித்துக் கொண்டு சென்னை திரும்பிய மறுநாளான செப்டம்பர் 17-ந் தேதி விருதுநகரில் காமராஜர் பிறந்த நாளையொட்டி, அவர் படித்த பள்ளியில் ‘காமராஜர் காலை உணவுத் திட்ட’ விரிவாக்கப் பணியை முதல்-அமைச்சர் ஜோசப் விஜய் தொடங்கி வைக்க இருப்பதாக கூறப்படுகிறது. அதே நாளில் மதுரை மீனாட்சியம்மன் கோவில் கும்பாபிஷேகமும் நடைபெற உள்ளதாக தெரிவிக்கப்பட்டுள்ளது. எனவே, முதலில் கும்பாபிஷேக நிகழ்ச்சியில் பங்கேற்றுவிட்டு, அதன்பிறகு விருதுநகருக்கு சென்று காலை உணவுத் திட்ட விரிவாக்கத்தை தொடங்கி வைக்க முதல்-அமைச்சர் செல்வார் என்றும் தகவல்கள் தெரிவிக்கின்றன.
