படம் தயாராகிறது… Generating image…
தமிழகத்தில் கடந்த சில மாதங்களாக மின்வெட்டு பிரச்சினை தொடர்ந்து அதிகரித்து வருகிறது. அறிவிப்பு இன்றி ஏற்படும் மின்தடையால் பொதுமக்கள் பெரும் சிரமங்களைச் சந்தித்து வருகின்றனர். இதனால் பாதிக்கப்பட்ட மக்கள் சில பகுதிகளில் போராட்டங்களிலும் ஈடுபட்டு வருகின்றனர். அமைச்சர்கள் பங்கேற்கும் நிகழ்ச்சிகளிலும் மின்வெட்டு ஏற்படுவது தொடர்கதையாகியுள்ளது. மின்பற்றாக்குறையைச் சமாளிக்கும் வகையில், கூடுதலாக 4,500 மெகாவாட் மின்சாரத்தைக் கொள்முதல் செய்வதற்காகத் தமிழக மின்வாரியம் டெண்டர் கோரியுள்ளது. பருவநிலை மாற்றங்கள் மற்றும் காற்றாலை மின் உற்பத்தியில் ஏற்பட்டுள்ள சரிவு ஆகியவை மின்வெட்டு அதிகரிப்பதற்கான காரணங்களாக அதிகாரிகள் தரப்பில் தெரிவிக்கப்படுகின்றன. தொடர் மின்வெட்டால் அன்றாட வாழ்க்கை பாதிக்கப்படுவதாகக் கூறும் பொதுமக்கள், இந்தப் பிரச்சினைக்கு அரசு விரைந்து தீர்வு காண வேண்டும் என வலியுறுத்தி வருகின்றனர். இந்நிலையில், தமிழகத்தின் தலைமைச் செயலகத்திலேயே இன்று திடீரென மின்தடை ஏற்பட்டது பரபரப்பை ஏற்படுத்தியுள்ளது. அங்குள்ள அமைச்சர்கள் செங்கோட்டையன் மற்றும் ஆதவ் அர்ஜுனா ஆகியோரின் அறைகள் மின்வெட்டால் இருளில் மூழ்கின. அமைச்சர்களின் அறைகள் அமைந்துள்ள முதல் தளம் முழுவதும் மின்சாரம் தடைபட்டதாகத் தெரிவிக்கப்பட்டுள்ளது. இந்தத் திடீர் மின்தடை எதனால் ஏற்பட்டது என்பது குறித்து மின்வாரிய ஊழியர்கள் ஆய்வு செய்து வருகின்றனர்.
