படம் தயாராகிறது… Generating image…
நீட் வினாத்தாள் விவகாரத்தை முன்னிறுத்தி மத்திய கல்வி அமைச்சர் தர்மேந்திர பிரதானை பதவியில் இருந்து நீக்க வேண்டும் என்று வலியுறுத்தி, டெல்லி ஜந்தர் மந்தரில் கரப்பான்பூச்சி ஜனதா கட்சியினர் தொடர்ந்து போராட்டத்தில் ஈடுபட்டு வருகின்றனர். இந்த விவகாரம் தொடர்பாக மத்திய அரசு சார்பில் மத்திய சுகாதார அமைச்சர் ஜே.பி. நட்டா கடந்த சில நாட்களுக்கு முன்பு போராட்டக்காரர்களுடன் பேச்சுவார்த்தை நடத்தினார். எனினும், அப்போது எந்த உடன்பாடும் எட்டப்படவில்லை.இதையடுத்து, நேற்று இரண்டாவது கட்ட பேச்சுவார்த்தை அரசியல் சாசன கிளப்பில் நடைபெற்றது. இதில் அரசு தரப்பில் ஜே.பி. நட்டாவுடன் பிரதமர் அலுவலக இணை அமைச்சர் ஜிதேந்திர சிங்கும் பங்கேற்றார். கரப்பான்பூச்சி ஜனதா கட்சி சார்பில் செய்தித் தொடர்பாளர்கள் சவுரவ் தாஸ் மற்றும் அசுதோஷ் ரங்கா கலந்து கொண்டனர். சுமார் இரண்டு மணி நேரம் நீடித்த இந்த சந்திப்பில் பல்வேறு அம்சங்கள் குறித்து விரிவாக ஆலோசிக்கப்பட்டது.பேச்சுவார்த்தைக்கு பின்னர் செய்தியாளர்களிடம் பேசிய ஜே.பி. நட்டா, போராட்டக்காரர்களின் கவலைகள் மற்றும் கோரிக்கைகள் குறித்து அரசு கவனமாக கேட்டறிந்ததாக தெரிவித்தார். தேர்வு முறையில் சீர்திருத்தம் தொடர்பாக அவர்கள் மூன்று முக்கிய கோரிக்கைகளையும், ஐந்து ஆலோசனைகளையும் முன்வைத்துள்ளதாக கூறிய அவர், அவற்றை அரசு உள்மட்டத்தில் ஆலோசித்து இன்று பிற்பகல் மீண்டும் சந்தித்து பதில் தெரிவிக்க உள்ளதாக கூறினார்.இதுகுறித்து கரப்பான்பூச்சி ஜனதா கட்சியின் தேசிய செய்தித் தொடர்பாளர் அசுதோஷ் ரங்கா கூறுகையில், தர்மேந்திர பிரதானின் பதவி விலகல் தொடர்பான கோரிக்கைக்கு பதிலளிக்க இன்று மதியம் வரை அரசு அவகாசம் கேட்டுள்ளதாக தெரிவித்தார். அமைச்சர் விரைவில் பதவியில் இருந்து நீக்கப்படுவார் என்ற நம்பிக்கையும் அவர் வெளியிட்டார்.மேலும், நீட் தேர்வு விவகாரத்தில் உயிரிழந்த மாணவர்களின் குடும்பங்களுக்கு ரூ.1 கோடி இழப்பீடு வழங்குவது மற்றும் மாணவர்கள் மீது பதிவு செய்யப்பட்டுள்ள முதல் தகவல் அறிக்கைகள் மற்றும் சட்ட நடவடிக்கைகளை திரும்பப் பெறுவது ஆகிய இரண்டு கோரிக்கைகளுக்கு கொள்கை ரீதியாக அரசு சாதகமான அணுகுமுறையை வெளிப்படுத்தியுள்ளதாக அவர் கூறினார்.அதேபோல், ஏற்கனவே பதிவு செய்யப்பட்ட வழக்குகளை மட்டும் அல்லாமல், எதிர்காலத்தில் போராட்டக்காரர்கள் மீது புதிய முதல் தகவல் அறிக்கைகள் அல்லது சட்ட நடவடிக்கைகள் எடுக்கப்படாது என்ற உறுதியையும் அரசு வழங்க வேண்டும் என்று கோரிக்கை விடுக்கப்பட்டுள்ளதாக தெரிவித்தார். இந்த விவகாரத்தில் விரைவில் எழுத்துப்பூர்வமான ஒப்பந்தம் கிடைக்கும் என எதிர்பார்ப்பதாகவும், தர்மேந்திர பிரதானின் ராஜினாமா தொடர்பாகவும் விரிவான ஆலோசனை நடைபெற்றுள்ளதாகவும் அவர் கூறினார். மேலும், இந்த விவகாரத்தை தொடர்ந்து இன்று பிற்பகல் மீண்டும் இரு தரப்பினரும் சந்திக்க மத்திய அரசு முன்மொழிந்துள்ளது.
