தமிழுக்கு எப்போதும் முன்னுரிமை: அமைச்சர் ரமேஷ்

மதுரை: கும்பாபிஷேகம் நடைபெறும் கோவில்களில் யாகசாலை பூஜைகள் மற்றும் தமிழ் பாராயணத்திற்காக தமிழ் ஓதுவார்கள் நியமிக்கப்படுவதாகவும், தமிழுக்கு அரசு எப்போதும் முன்னுரிமை அளிக்கும் என்றும் இந்து அறநிலையத்துறை அமைச்சர் ரமேஷ் தெரிவித்துள்ளார். மதுரை மீனாட்சி அம்மன் கோவில் கும்பாபிஷேகத்தில் தமிழ் ஓதுவார்களை அனுமதிக்க வேண்டும் என வலியுறுத்தி, கோவில் முன்பு தமிழ் ஓதுவார்கள் போராட்டத்தில் ஈடுபட்டனர். அவர்களிடம் அமைச்சர் நிர்மல்குமார் பேச்சுவார்த்தை நடத்தினார். இதுதொடர்பாக செய்தியாளர்களிடம் பேசிய அமைச்சர் ரமேஷ், கும்பாபிஷேகத்துக்கான யாகசாலை பூஜைகள் நடைபெறும் அனைத்து இடங்களிலும் அவற்றை தமிழில் நடத்துவதற்கும், தமிழ் பாராயணம் செய்வதற்கும் தேவையான ஏற்பாடுகள் செய்யப்பட்டுள்ளதாக தெரிவித்தார். மேலும், இதற்காக தமிழகம் முழுவதும் உள்ள 27 ஓதுவார்கள் சிறப்பு ஏற்பாட்டின் கீழ் மதுரைக்கு அழைத்து வரப்பட்டு, கடந்த 11-ம் தேதி முதல் பணியில் ஈடுபட்டு வருவதாகவும் அவர் கூறினார். “தமிழுக்கு நாம் எப்போதும் முன்னுரிமை அளிப்போம். முதல்வர் எப்போதும் தமிழை முன்னிறுத்துபவர். மதுரை மீனாட்சியம்மன் கோவில் கும்பாபிஷேகத்திலும் தமிழ் ஓதுவார்கள் நிச்சயமாக பங்கேற்பார்கள்” என்று அமைச்சர் ரமேஷ் தெரிவித்தார். மேலும், கோவிலில் தற்போது அரசால் நியமிக்கப்பட்ட ஓதுவார்களே பணியாற்றி வருவதாகவும், அவர்கள் யாரும் போராட்டத்தில் ஈடுபடவில்லை என்றும் அவர் விளக்கம் அளித்தார்.