படம் தயாராகிறது… Generating image…
“தமிழர் தந்தை” சி.பா.ஆதித்தனாரின் 122-வது பிறந்த நாள் இன்று (ஞாயிற்றுக்கிழமை) சிறப்பாகக் கொண்டாடப்பட்டு வருகிறது. இதையொட்டி, சென்னை எழும்பூரில் உள்ள ஆதித்தனார் சாலையில் அமைந்துள்ள அவரது முழு உருவச் சிலை மலர்களால் அலங்கரிக்கப்பட்டுள்ளது. சிலையின் அருகே அவரது உருவப்படமும் வைக்கப்பட்டுள்ளது. தமிழக அரசு சார்பில் நடைபெற்ற விழாவில் மயிலாட்டம், காளையாட்டம் உள்ளிட்ட நிகழ்ச்சிகளுக்கும் ஏற்பாடு செய்யப்பட்டிருந்தது. சி.பா.ஆதித்தனாரின் சிலைக்கு ‘தினத்தந்தி’ குழும தலைவர் சி.பாலசுப்பிரமணியன் ஆதித்தன் மற்றும் ‘தினத்தந்தி’ குழும இயக்குனர் பா.சிவந்தி ஆதித்தன் ஆகியோர் மாலை அணிவித்து மரியாதை செலுத்தினர். இந்நிலையில், முதல்-அமைச்சர் விஜய் தனது எக்ஸ் வலைதளப் பதிவில் சி.பா.ஆதித்தனாரை நினைவுகூர்ந்து புகழஞ்சலி செலுத்தியுள்ளார். அவர் வெளியிட்டுள்ள பதிவில், தமிழ் இதழியலின் முன்னோடிகளில் ஒருவராகவும், ‘தினத்தந்தி’ நாளிதழின் நிறுவனராகவும், முன்னாள் சட்டமன்றப் பேரவைத் தலைவராகவும் விளங்கிய சி.பா.ஆதித்தனாரின் பிறந்த நாளில், தமிழுக்கும், தமிழ்ச் சமூகத்திற்கும், இதழியல் துறைக்கும் அவர் செய்த பணிகளை நினைவுகூர்ந்து போற்றுவதாக தெரிவித்துள்ளார். இதழியல் துறையில் எளிமையான, உயிரோட்டமான தமிழ் நடையை அறிமுகப்படுத்தியதுடன், தமிழகத்தின் கடைக்கோடி மக்களும் செய்தித்தாள் வாசிக்கும் பழக்கத்தைப் பெறுவதற்கு வழிவகுத்தவர் சி.பா.ஆதித்தனார் என்றும் அவர் குறிப்பிட்டுள்ளார். மேலும், அரசியல் மற்றும் சமூக விழிப்புணர்வை மக்களிடம் ஏற்படுத்தியதில் அவர் முக்கியப் பங்காற்றியதாகவும் தெரிவித்துள்ளார். தமிழ்நாடு அரசின் அமைச்சர் உள்ளிட்ட பல்வேறு உயர்ந்த பொறுப்புகளை வகித்த சி.பா.ஆதித்தனார், சட்டமன்றப் பேரவைத் தலைவராக இருந்த காலத்தில் ஒரு முக்கிய நடைமுறையையும் அறிமுகப்படுத்தினார். சட்டமன்றக் கூட்டம் தொடங்குவதற்கு முன்பு தினமும் ஒரு திருக்குறளை கூறி அவையைத் தொடங்கும் வழக்கத்தை அவர் கொண்டு வந்ததாக முதல்-அமைச்சர் விஜய் தெரிவித்துள்ளார். தமிழ்மொழியும், தமிழினமும் முன்னேற்றம் காண வேண்டும் என்ற நோக்கில் தனது வாழ்நாள் முழுவதும் பாடுபட்ட “தமிழர் தந்தை” சி.பா.ஆதித்தனாரின் புகழ் தமிழ்நாட்டு மண்ணில் என்றும் நிலைத்திருக்கும் என்றும் முதல்-அமைச்சர் விஜய் தனது பதிவில் தெரிவித்துள்ளார்.
