படம் தயாராகிறது… Generating image…
தமிழகம் முழுவதும் ஆயுதபூஜை விழா இன்று உற்சாகத்துடன் கொண்டாடப்பட்டு வருகிறது. வீடுகள், வணிக நிறுவனங்கள், அலுவலகங்கள், கல்வி நிலையங்கள் எனப் பல்வேறு இடங்களிலும் சிறப்பு பூஜைகள் நடத்தப்பட்டு வருகின்றன. இந்துக்களின் முக்கிய பண்டிகைகளில் ஒன்றான நவராத்திரி விழா, கடந்த 11-ம் தேதி தொடங்கி நடைபெற்று வருகிறது. அதன் ஒன்பதாவது நாளான இன்று சரஸ்வதி பூஜை மற்றும் ஆயுதபூஜை கொண்டாடப்படுகிறது. தொழில் நிறுவனங்கள், வணிக வளாகங்கள் மற்றும் தொழிற்சாலைகளில் அன்றாடப் பணிகளுக்குப் பயன்படுத்தப்படும் இயந்திரங்கள், கருவிகள் உள்ளிட்டவற்றை சுத்தம் செய்து அலங்கரித்தனர். பின்னர் அவற்றுக்கு பூஜைகள் செய்து வழிபாடு நடத்தினர். கல்வி மற்றும் கலைகளின் தெய்வமாக போற்றப்படும் சரஸ்வதிக்கும் சிறப்பு வழிபாடுகள் நடைபெற்றன. தொழிற்சாலைகள் மற்றும் நிறுவனங்களில் பணியாற்றும் ஊழியர்களுக்கு இனிப்புகள், பொரி, சுண்டல் ஆகியவை வழங்கப்பட்டன. கல்வி நிலையங்களில் சரஸ்வதி தேவியின் படத்தின் முன்பாக மாணவர்கள் புத்தகங்களை வைத்து வழிபட்டனர். வாழை இலைகளில் சர்க்கரைப் பொங்கல், சுண்டல், அவல், பொரி, கடலை மற்றும் பழங்களைப் படைத்து வழிபாடு செய்தனர். பொதுமக்களும் தங்களது வாகனங்களை சுத்தம் செய்து, அவற்றுக்கு பூஜைகள் நடத்தி வருகின்றனர். ஆயுதபூஜையை முன்னிட்டு கோயில்களிலும் சிறப்பு வழிபாடுகள் மற்றும் தரிசனங்கள் நடைபெறுகின்றன. திருவண்ணாமலை, திருச்செந்தூர் உள்ளிட்ட தமிழகத்தின் முக்கிய கோயில்களில் பக்தர்கள் அதிக அளவில் திரண்டு சாமி தரிசனம் செய்து வருகின்றனர்.
