படம் தயாராகிறது… Generating image…
டெல்லியில் காவிரி மேலாண்மை ஆணையத்தின் 58-வது கூட்டம் இன்று காணொலி வாயிலாக நடைபெற்றது. ஆணையத்தின் தலைவர் எஸ்.கே. ஹல்தர் தலைமையில் நடைபெற்ற இந்தக் கூட்டத்தில் தமிழ்நாடு, கர்நாடகா உள்ளிட்ட மாநிலங்களின் பிரதிநிதிகள் கலந்து கொண்டனர். செப்டம்பர் 25-ம் தேதி முதல் அடுத்த 15 நாட்களுக்கு தமிழ்நாட்டுக்கு கர்நாடகா திறந்துவிட வேண்டிய காவிரி நீர் குறித்து கூட்டத்தில் ஆலோசிக்கப்பட்டது. போதிய மழை பெய்யாததுடன், அணைகளுக்கு எதிர்பார்த்த அளவில் நீர்வரத்து இல்லை என்பதைக் காரணமாகக் கூறி தமிழகத்துக்கு காவிரி நீரை திறக்க கர்நாடகா தரப்பில் எதிர்ப்பு தெரிவிக்கப்பட்டது. இதையடுத்து, தமிழ்நாட்டுக்கு வழங்க வேண்டிய நீரை கர்நாடகா திறந்துவிட வேண்டும் என தமிழக அதிகாரிகள் வலியுறுத்தினர். இதன் முடிவில், தமிழ்நாட்டுக்கு காவிரியில் இருந்து வினாடிக்கு 4,000 கன அடி வீதம் 15 நாட்களுக்கு நீர் திறக்க காவிரி மேலாண்மை ஆணையம் உத்தரவிட்டுள்ளது. காவிரி நீர் ஒழுங்காற்றுக் குழுவின் பரிந்துரையை ஏற்று, கர்நாடக அரசுக்கு இந்த உத்தரவை காவிரி மேலாண்மை ஆணையம் பிறப்பித்துள்ளது.
