தேசப்பற்றையும், தெய்வீகத்தையும் வாழ்வின் இரு கண்களாகக் கொண்டவர் முத்துராமலிங்க தேவர் - எடப்பாடி பழனிசாமி புகழாரம்

பசும்பொன் முத்துராமலிங்கத் தேவர் தேசப்பற்றையும், ஆன்மிகத்தையும் தனது வாழ்வின் இரு முக்கியக் கொள்கைகளாகக் கடைப்பிடித்தவர் என்று அதிமுக பொதுச்செயலாளர் எடப்பாடி பழனிசாமி புகழாரம் சூட்டியுள்ளார். முத்துராமலிங்கத் தேவரின் குருபூஜையை முன்னிட்டு அவர் வெளியிட்டுள்ள பதிவில், தியாகம் மற்றும் நேர்மையை வாழ்க்கையின் அடிப்படை நெறிகளாகக் கொண்டு வாழ்ந்த தேவரின் சிறப்பையும், பெருமையையும் போற்றித் தலைவணங்குவதாகக் குறிப்பிட்டுள்ளார். மேலும், தேவர் ஜெயந்தி மற்றும் குருபூஜை விழாவையொட்டி மதுரை தெப்பக்குளத்தில் அமைந்துள்ள மருது சகோதரர்களின் சிலைக்கு முதலில் மரியாதை செலுத்தியதாகவும், பின்னர் ராமநாதபுரம் மாவட்டம் பசும்பொன்னில் உள்ள முத்துராமலிங்கத் தேவரின் நினைவிடத்திற்குச் சென்றதாகவும் தெரிவித்துள்ளார். அங்கு அதிமுக சார்பில் மறைந்த முன்னாள் முதலமைச்சர் ஜெயலலிதா வழங்கிய 13.5 கிலோ தங்கக் கவசம் அணிவிக்கப்பட்டுள்ள தேவரின் திருவுருவச் சிலைக்கு மாலை அணிவித்து மரியாதை செலுத்தியதாகவும் அவர் குறிப்பிட்டுள்ளார். ஒருவரை உயர்ந்தவர் அல்லது தாழ்ந்தவர் எனப் பாகுபடுத்தாமல், அவர்களின் ஒழுக்கத்தை மட்டுமே அடிப்படையாகக் கொண்டு மதிக்க வேண்டும் என்ற முத்துராமலிங்கத் தேவரின் உயர்ந்த கருத்து, மனிதகுலத்திற்கு என்றும் வழிகாட்டியாகத் திகழ வேண்டும் என்றும் எடப்பாடி பழனிசாமி தனது பதிவில் தெரிவித்துள்ளார்.