படம் தயாராகிறது… Generating image…
'நீட்' வினாத்தாள் கசிவு தொடர்பான சர்ச்சை நாடு முழுவதும் தொடர்ந்து எதிரொலித்து வருகிறது. இந்த விவகாரத்துக்கும், 'நீட்' தேர்வில் தோல்வியடைந்ததைத் தொடர்ந்து மாணவர்கள் தற்கொலை செய்த சம்பவங்களுக்கு தார்மீக பொறுப்பேற்று மத்திய கல்வி அமைச்சர் தர்மேந்திர பிரதான் பதவி விலக வேண்டும் என்ற கோரிக்கையையும் வலியுறுத்தி, கரப்பான் பூச்சி ஜனதா கட்சியினர் கடந்த மாதம் 20-ஆம் தேதி முதல் டெல்லி ஜந்தர் மந்தரில் தொடர் போராட்டத்தில் ஈடுபட்டு வருகின்றனர்.இந்தப் போராட்டத்திற்கு சமூக ஆர்வலர் சோனம் வாங்சுக்கும் ஆதரவு தெரிவித்திருந்தார். மேலும், நாடாளுமன்ற மழைக்கால கூட்டத்தொடர் தொடங்கும் நாளில் நாடாளுமன்றத்தை நோக்கி பேரணி நடத்தப்படும் என்று அவர் அறிவித்திருந்தார். ஆனால், அதற்கு சில நாட்களுக்குப் பிறகு உடல்நலக் குறைவு காரணமாக அவர் மருத்துவமனையில் அனுமதிக்கப்பட்டார்.சோனம் வாங்சுக் மருத்துவமனையில் இருந்தபோதிலும், திட்டமிட்டபடி கரப்பான் பூச்சி ஜனதா கட்சியினர் நாடாளுமன்றத்தை நோக்கி பேரணி நடத்தினர். இதில் நாட்டின் பல்வேறு பகுதிகளில் இருந்து ஆயிரக்கணக்கான மாணவர்கள் மற்றும் இளைஞர்கள் கலந்து கொண்டனர். பேரணியை தடுக்க போலீசார் பல இடங்களில் தடுப்புகள் அமைத்திருந்தாலும், கூட்டம் அதிகரித்ததால் தடியடி நடத்தப்பட்டதுடன் கண்ணீர் புகைக்குண்டுகளும் பயன்படுத்தப்பட்டன. இதற்கு பதிலளிக்கும் வகையில் போலீசார் மீது கல்வீச்சு நடைபெற்றதாகவும் கூறப்படுகிறது.போலீசார் நடத்திய தடியடியில் பல இளைஞர்கள் காயமடைந்தனர். அவர்கள் நாடாளுமன்றம் அருகிலுள்ள ஆர்.எம்.எல். மருத்துவமனையில் சிகிச்சைக்காக அனுமதிக்கப்பட்டனர். மாணவர்கள் மற்றும் இளைஞர்கள் மீது நடத்தப்பட்ட தாக்குதல் நாடு முழுவதும் அரசியல் மற்றும் பொதுமக்கள் மத்தியில் பரபரப்பை ஏற்படுத்தியது. எதிர்க்கட்சிகள் இந்தச் சம்பவத்தை கடுமையாக எதிர்த்துள்ள நிலையில், காங்கிரஸ் கட்சியும் மாணவர்களுக்கு ஆதரவாக தனிப்பட்ட போராட்டங்களை முன்னெடுத்து வருகிறது. இதன் காரணமாக பல்வேறு மாநிலங்களில் இருந்து இளைஞர்கள் டெல்லி நோக்கி வருவதால் தலைநகரில் பதற்றமான சூழல் நிலவி வருகிறது.இந்த சூழ்நிலையில், டெல்லியில் பாதுகாப்பு ஏற்பாடுகளை மேலும் வலுப்படுத்த மத்திய அரசு கூடுதலாக 20 சிஆர்பிஎப் கம்பெனிகளை பணியில் அமர்த்த உத்தரவிட்டுள்ளது. உள்துறை அமைச்சகம் செவ்வாய்க்கிழமை இரவு இந்த உத்தரவை வெளியிட்டதைத் தொடர்ந்து, மேற்கு வங்கத்தின் கொல்கத்தாவில் இருந்த சிஆர்பிஎப் வீரர்கள் விமானம் மூலம் டெல்லிக்கு அனுப்பப்பட்டு வருகின்றனர்.பாதுகாப்பு அமைப்புகளின் அதிகாரிகள் கூறுகையில், கரப்பான் பூச்சி ஜனதா கட்சியின் போராட்டங்கள், பல்வேறு அரசியல் கட்சிகள் நடத்தும் ஆர்ப்பாட்டங்கள் மற்றும் நடைபெற்று வரும் நாடாளுமன்ற மழைக்கால கூட்டத்தொடரை கருத்தில் கொண்டு தலைநகரில் சட்டம்-ஒழுங்கை உறுதிப்படுத்தவே இந்த கூடுதல் படைப்பிரிவுகள் நியமிக்கப்பட்டுள்ளன என்றனர். அண்மைய போராட்டங்களின் போது சில இடங்களில் வன்முறை சம்பவங்கள் பதிவானதால் பாதுகாப்பை உடனடியாக அதிகரிப்பது அவசியமானதாக இருந்ததாகவும் அவர்கள் தெரிவித்தனர்.தற்போது டெல்லிக்கு அனுப்பப்பட்டுள்ள இந்த 20 சிஆர்பிஎப் கம்பெனிகளும், மேற்கு வங்க சட்டசபை தேர்தலையொட்டி அங்கு நிறுத்தப்பட்டிருந்தன. தேர்தல் முடிந்த பிறகும் மாநில அரசின் கோரிக்கையின்படி அவை அங்கேயே செயல்பட்டு வந்த நிலையில், தற்போது அவை டெல்லிக்கு மாற்றப்பட்டுள்ளன. ஒரு சிஆர்பிஎப் கம்பெனியில் சுமார் 100 வீரர்கள் இருப்பர். இதற்கு முன்பே, கரப்பான் பூச்சி ஜனதா கட்சியின் போராட்டங்கள் மற்றும் ஜூலை 20-ஆம் தேதி தொடங்கிய நாடாளுமன்ற மழைக்கால கூட்டத்தொடரை முன்னிட்டு சுமார் 30 சிஆர்பிஎப் கம்பெனிகளும், கலவரத் தடுப்பு சிறப்புப் பிரிவான விரைவு அதிரடிப்படையும் டெல்லி போலீசாருக்கு வழங்கப்பட்டிருந்தன. தற்போது மேலும் 20 கம்பெனிகள் சேர்க்கப்பட்டுள்ளதால் தலைநகரின் பாதுகாப்பு ஏற்பாடுகள் இன்னும் வலுப்படுத்தப்பட்டுள்ளன.
