படம் தயாராகிறது… Generating image…
தமிழகத்தில் டெங்கு காய்ச்சல் பாதிப்பு தொடர்ந்து அதிகரித்து வரும் நிலையில், தனியார் மருத்துவமனைகளில் சிகிச்சைக்காக அதிக கட்டணம் வசூலிக்கப்படுவதாக எழுந்த புகார்களைத் தொடர்ந்து, தமிழக சுகாதாரத்துறை எச்சரிக்கை விடுத்துள்ளது. மாநிலத்தில் இதுவரை டெங்கு காய்ச்சலால் 9 பேர் உயிரிழந்துள்ளதாகவும், 16 ஆயிரம் பேர் பாதிக்கப்பட்டு சிகிச்சை பெற்று வருவதாகவும் தெரிவிக்கப்பட்டுள்ளது. மேலும், தினசரி நூற்றுக்கணக்கானோர் டெங்கு பாதிப்புக்கு உள்ளாகி வருகின்றனர். இந்நிலையில், டெங்கு காய்ச்சலால் பாதிக்கப்பட்டு தனியார் மருத்துவமனைகளில் சிகிச்சை பெறச் செல்லும் நோயாளிகளிடம் கூடுதல் கட்டணம் வசூலிக்கப்படுவதாக சுகாதாரத்துறைக்கு புகார்கள் வந்துள்ளன. சில தனியார் மருத்துவமனைகளில் டெங்கு நோயாளிகளுக்கு சாதாரண சிகிச்சை அளிக்க ரூ.22 ஆயிரம் முதல் ரூ.75 ஆயிரம் வரையும், அவசர சிகிச்சைப் பிரிவில் அனுமதித்து சிகிச்சை அளிக்க ரூ.75 ஆயிரம் முதல் ரூ.2 லட்சம் வரையும் கட்டணம் வசூலிக்கப்படுவதாக புகார் தெரிவிக்கப்பட்டுள்ளது. இதையடுத்து, விதிமுறைகளை மீறி கூடுதல் கட்டணம் வசூலிக்கும் தனியார் மருத்துவமனைகள் மீது துறை ரீதியான நடவடிக்கை எடுக்கப்படும் என தமிழக சுகாதாரத்துறை எச்சரித்துள்ளது. மேலும், தனியார் மருத்துவமனைகளில் இதுபோன்ற கூடுதல் கட்டணம் வசூலிக்கப்படுவது தொடர்பான புகார்கள் இருந்தால், பொதுமக்கள் 104 என்ற எண்ணில் தொடர்புகொண்டு தெரிவிக்கலாம் எனவும் சுகாதாரத்துறை அறிவுறுத்தியுள்ளது.
