படம் தயாராகிறது… Generating image…
கொலை வழக்கில் கைது செய்யப்பட்டு, ஜாமினில் வெளியே வந்த மதன் என்ற ரவுடி, மர்ம நபர்களால் துரத்திச் செல்லப்பட்டு கொலை செய்யப்பட்டுள்ளார். காவல்துறையின் கவனக்குறைவே இந்தச் சம்பவத்துக்குக் காரணம் என திமுக தலைவர் மு.க.ஸ்டாலின் குற்றம்சாட்டியுள்ளார். இதுதொடர்பாக அவர் தனது எக்ஸ் தளத்தில் வெளியிட்ட பதிவில் கூறியிருப்பதாவது: தமிழ்நாட்டில் தொடர்ந்து நடைபெறும் கொலைச் சம்பவங்கள், அதிகரித்து வரும் போதைப்பொருள் நடவடிக்கைகள், காவல்துறையின் செயல்பாட்டில் காணப்படும் தொய்வு ஆகியவை கவலை அளிக்கின்றன. சில நாட்களுக்கு முன்பு திண்டுக்கல் மாவட்டத்தில், காவல் நிலையத்தில் ஜாமின் நடைமுறைகளை முடித்துவிட்டு வெளியே வந்த ஒருவர், தனது மனைவியின் கண் முன்னிலையிலேயே கொடூரமாகக் கொலை செய்யப்பட்டார். அந்தச் சம்பவத்தின்போதே, ஜாமினில் விடுவிக்கப்படும் குற்றவாளிகள் முறையாகக் கண்காணிக்கப்படுகிறார்களா என்று கேள்வி எழுப்பியிருந்தேன். ஆனால், சிவகங்கையில் நேற்று நடந்த மற்றொரு கொலை, இதுபோன்றகுற்றவாளிகளைக் கண்காணிப்பதில் காவல்துறை போதிய நடவடிக்கை எடுக்கவில்லை என்பதைக் காட்டுகிறது. கொலை வழக்கில் கைதாகி ஜாமினில் வந்த மதன் என்ற ரவுடி, துரத்திச் செல்லப்பட்டு கொலை செய்யப்பட்டுள்ளார். காவல்துறையின் அலட்சியத்தால் இந்த உயிரிழப்பு ஏற்பட்டுள்ளதாகக் கருதுகிறேன். பெருந்துறை அருகே செவிலியர் ஒருவர் கடத்தப்பட்டு, பாலியல் வன்கொடுமைக்கு ஆளாக்கப்பட்ட பின்னர் கொலை செய்யப்பட்டுள்ளார். ஐந்து நாட்கள் கழித்தே அவரது உடல் கண்டுபிடிக்கப்பட்டுள்ளது. அதேநேரத்தில், ஆளும் கட்சியைச் சேர்ந்தவர்களின் போதைப்பொருள் கடத்தல் நடவடிக்கைகளும் தொடர்ந்து வெளிச்சத்துக்கு வருகின்றன. வேதாரண்யத்தில் த.வெ.க. ஒன்றியச் செயலாளர் ஒருவர் கஞ்சா கடத்தல் வழக்கில் கைது செய்யப்பட்டார். தற்போது அதே மாவட்டத்தில், மெத்தம்பெட்டமைன் என்ற போதைப்பொருளைத் தயாரித்து விற்பனை செய்யும் பெரிய மையமாகத் தமிழ்நாட்டை மாற்ற முயன்றதாகக் கூறப்படும் த.வெ.க. நிர்வாகி 'மெத்' பூபாலனும் கைது செய்யப்பட்டுள்ளார். முதலமைச்சரின் திரைப்படங்களைப் பார்த்து அவரது கட்சியினர் இத்தகைய செயல்களைக் கற்றுக்கொள்கிறார்களா? இவர்களைப் போன்றவர்களை மாநிலக் காவல்துறையால் கண்டுபிடித்து கைது செய்ய முடியவில்லையா? அல்லது ஆளும் கட்சியைச் சேர்ந்தவர்கள் என்பதால் இத்தனை காலமாக நடவடிக்கை எடுக்காமல் இருந்தார்களா? போதைப்பொருள் ஒழிப்பில் உண்மையான அக்கறை இருந்தால், முதலமைச்சர் முதலில் தனது கட்சியினரைக் கட்டுப்படுத்த வேண்டும். அதற்கு காவல்துறையும் அவரது நேரடிக் கட்டுப்பாட்டில் இருக்க வேண்டும். ஆனால், தற்போது நிலைமை என்னவாக இருக்கிறது? காவல்துறை அமைச்சராக முதலமைச்சர் பெயரளவில்தான் இருக்கிறாரா? தனது மற்ற துறைகளின் பொறுப்புகளை அமைச்சர்களிடம் ஒப்படைத்ததைப் போல, காவல்துறையின் செயல்பாடுகளையும் வேறு ஒருவரிடம் விட்டுவிட்டாரா? காவல்துறையின் மீது முதலமைச்சர் உரிய கவனம் செலுத்தவில்லை என்பதையே தொடர்ச்சியாக நடக்கும் அரிவாள் தாக்குதல்களும், மத்திய விசாரணை அமைப்புகளால் கண்டுபிடிக்கப்படும் போதைப்பொருள் கடத்தல் சம்பவங்களும் வெளிப்படுத்துகின்றன. முதலமைச்சரே, உங்கள் அலட்சியம் உயிரிழப்புகளுக்கு வழிவகுக்கிறது. 'போதைப்பொருளை விடுங்கள், விளையாட்டில் ஈடுபடுங்கள்' என்று அறிவுறுத்தும் நீங்கள், முதலில் ஓய்வெடுப்பதைத் தவிர்த்து, உங்கள் பொறுப்பான காவல்துறையின் செயல்பாடுகளில் நேரடியாகக் கவனம் செலுத்துங்கள். இவ்வாறு மு.க.ஸ்டாலின் தனது பதிவில் தெரிவித்துள்ளார்.
