படம் தயாராகிறது… Generating image…
சென்னை - பெங்களூரு இடையிலான பயண நேரத்தைக் குறைக்கும் நோக்கில் அமைக்கப்பட்டு வரும் அதிவிரைவு நெடுஞ்சாலைத் திட்டத்தில், தமிழகத்தில் எஞ்சியுள்ள 14 கி.மீ. தூரப் பணிகளை மேற்கொள்ள ரூ.614 கோடி மதிப்பில் டெண்டர் வெளியிடப்பட்டுள்ளது. சென்னை மற்றும் பெங்களூரு நகரங்களை இணைக்கும் வகையில் 263 கி.மீ. நீளத்தில் இந்த அதிவிரைவு சாலை அமைக்கப்பட்டு வருகிறது. சுமார் 14 ஆண்டுகளுக்கு முன்பு அறிவிக்கப்பட்ட இத்திட்டத்திற்கு, 2022-ம் ஆண்டு மே மாதம் அடிக்கல் நாட்டப்பட்டது. தற்போது சாலை வழியாக சென்னையில் இருந்து பெங்களூரு செல்ல 5 முதல் 7 மணி நேரம் வரை ஆகிறது. இந்த அதிவிரைவு சாலை பயன்பாட்டுக்கு வந்தால், பயண நேரம் 3 மணி நேரமாகக் குறையும் என தேசிய நெடுஞ்சாலை ஆணையம் தெரிவித்துள்ளது. மொத்தம் ரூ.18,000 கோடி மதிப்பில் 10 தொகுப்புகளாகப் பிரிக்கப்பட்டு பணிகள் நடைபெற்று வருகின்றன. இதுவரை 230 கி.மீ. தூரத்திற்கான பணிகள் நிறைவடைந்துள்ளன. கர்நாடக மாநிலத்தில் ஹோஸ்கோட்டே முதல் பெத்தமங்களா வரையிலான 71 கி.மீ. சாலைப் பணிகள் முழுமையாக முடிக்கப்பட்டு போக்குவரத்துக்கு திறக்கப்பட்டுள்ளன. ஆந்திர மாநிலம் மற்றும் தமிழக - ஆந்திர எல்லைப் பகுதிகளில் 90 சதவீதப் பணிகள் நிறைவடைந்துள்ளன. தமிழகத்தில் மொத்தமுள்ள 106 கி.மீ. தூரத்தில் இதுவரை 92 கி.மீ. பணிகள் முடிக்கப்பட்டுள்ளன. இந்தத் திட்டம் முதலில் 2024-ம் ஆண்டு மார்ச் மாதத்திற்குள் நிறைவடையும் என எதிர்பார்க்கப்பட்டது. ஆனால், பல்வேறு காரணங்களால் பணிகள் தாமதமானதால், திட்ட மதிப்பீட்டுத் தொகையும் ரூ.10,507 கோடியாக அதிகரித்துள்ளது. இந்நிலையில், தமிழகத்தில் எஞ்சியுள்ள 14 கி.மீ. சாலைப் பணிகளை ரூ.614 கோடி செலவில் மேற்கொள்ள தேசிய நெடுஞ்சாலை ஆணையம் திட்டமிட்டுள்ளது. இதுகுறித்து ஆணைய அதிகாரிகள் கூறுகையில், கர்நாடகா மற்றும் ஆந்திர மாநிலங்களில் பெரும்பாலான பணிகள் நிறைவடைந்துவிட்டதாகத் தெரிவித்தனர். தமிழகத்தில் நிலம் கையகப்படுத்துவதில் ஏற்பட்ட தாமதம், மின்சார இணைப்புகள் மற்றும் குடிநீர் குழாய்கள் உள்ளிட்ட கட்டமைப்புகளை மாற்றியமைப்பதில் ஏற்பட்ட சிக்கல்கள் ஆகியவை பணிகள் தாமதமாவதற்கு முக்கியக் காரணங்களாக அமைந்தன. மேலும், சில பகுதிகளில் ஒப்பந்ததாரர்களின் பணிச் செயல்பாடுகளிலும் குறைபாடுகள் இருந்ததாகக் கூறினர். அரக்கோணம் - காஞ்சிபுரம் இடையிலான 25 கி.மீ. சாலைப் பணிகள் தொடர்பாக நீதிமன்றத்தில் வழக்கு நிலுவையில் இருந்ததும் திட்டத்தை தாமதப்படுத்தியது. தற்போது அந்தப் பிரச்சினைக்குத் தீர்வு காணப்பட்டுள்ள நிலையில், முதல்கட்டமாக 11 கி.மீ. தூரப் பணிகள் நிறைவடைந்துள்ளன. தொடர்ந்து, மீதமுள்ள 14 கி.மீ. தூரத்திற்கான பணிகளை ரூ.614 கோடியில் மேற்கொள்ள டெண்டர் வெளியிடப்பட்டுள்ளது. விரைவில் ஒப்பந்ததாரர் தேர்வு செய்யப்பட்டு பணிகள் தொடங்கப்படும் என்றும், அடுத்த நான்கு மாதங்களுக்குள் பணிகளை முடித்து சாலையைப் பயன்பாட்டுக்குக் கொண்டுவர நடவடிக்கை எடுக்கப்படும் என்றும் அதிகாரிகள் தெரிவித்தனர்.
