படம் தயாராகிறது… Generating image…
சென்னையில் உள்ள தனியார் மருத்துவமனைகளில் பணியாற்றும் மருத்துவர்களுக்கு, டெங்கு காய்ச்சலைக் கண்டறிந்து சிகிச்சை அளிப்பது மற்றும் நோய் தடுப்பு நடவடிக்கைகள் குறித்து மாநகராட்சி சார்பில் பயிற்சி அளிக்கப்பட்டது. பெருநகர சென்னை மாநகராட்சியின் 1 முதல் 15 வரையிலான மண்டலங்களில் செயல்படும் தனியார் மருத்துவமனைகளின் மருத்துவர்களுக்கான இப்பயிற்சிக் கூட்டம், அக்டோபர் 15, 2026 அன்று ரிப்பன் கட்டட வளாகத்தில் உள்ள அம்மா மாளிகை கூட்டரங்கில் நடைபெற்றது. இந்த நிகழ்ச்சியில் மாநகர நல அலுவலர் டாக்டர் எம். ஜெகதீசன், வடக்கு, மத்தியம் மற்றும் தெற்கு பகுதிகளுக்கான கூடுதல் மாநகர நல அலுவலர்கள், 1 முதல் 15 வரையிலான மண்டலங்களின் நல அலுவலர்கள் மற்றும் மருத்துவ அலுவலர்கள் பங்கேற்றனர். ராஜீவ் காந்தி அரசு மருத்துவமனையில் பேராசிரியராகப் பணியாற்றி ஓய்வுபெற்ற டாக்டர் ரகுநந்தனும் நிகழ்ச்சியில் கலந்துகொண்டார். அவர், தனியார் மருத்துவமனை மருத்துவர்களுக்கு டெங்கு காய்ச்சல் மேலாண்மை தொடர்பான பயிற்சியை வழங்கினார். மருத்துவமனைகளுக்கு காய்ச்சல் அறிகுறிகளுடன் வரும் நோயாளிகளிடம் டெங்கு பாதிப்பைக் கண்டறிவது, நோய் உறுதியானவர்களுக்கு உரிய சிகிச்சை அளிப்பது ஆகியவை குறித்து விளக்கப்பட்டது. மேலும், டெங்கு பாதிப்பு கண்டறியப்பட்ட நோயாளிகள் தொடர்பான விவரங்களை I.H.I.P. மற்றும் HIMS ஆகிய இணையவழி அமைப்புகள் மூலம் சென்னை மாநகராட்சிக்குத் தெரிவிப்பதன் அவசியம் குறித்தும் மருத்துவர்களுக்கு எடுத்துரைக்கப்பட்டது. பயிற்சியைத் தொடர்ந்து, டெங்கு காய்ச்சல் தொடர்பாக தனியார் மருத்துவர்கள் எழுப்பிய சந்தேகங்களுக்கு விளக்கங்கள் அளிக்கப்பட்டன. இதனிடையே, டெங்கு பாதிப்பு குறித்த தகவல்களைப் பெற்ற பின்னர், சம்பந்தப்பட்ட நோயாளிகளின் வீடுகளுக்குச் சென்று மாநகராட்சி மேற்கொள்ளும் தடுப்பு நடவடிக்கைகள் குறித்தும் மருத்துவர்களுக்குத் தெரிவிக்கப்பட்டது. இதுகுறித்து சென்னை மாநகராட்சி வெளியிட்டுள்ள செய்திக்குறிப்பில் தெரிவிக்கப்பட்டுள்ளது.
