படம் தயாராகிறது… Generating image…
தமிழக சட்டசபையில் நேற்று காவல்துறை மற்றும் தீயணைப்பு, மீட்புத்துறை மானியக் கோரிக்கை மீதான விவாதம் நடைபெற்றது. அப்போது உறுப்பினர்களின் கேள்விகளுக்கு முதல்-அமைச்சர் விஜய் பதிலளித்து பேசினார். தனது உரையின்போது, கட்சி நிதி பெற்றது தொடர்பான விவகாரத்தில் திமுக தலைவர் மு.க.ஸ்டாலின் மற்றும் உதயநிதி மீது அவர் பகிரங்கமாக குற்றச்சாட்டுகளை முன்வைத்தார். இதனைத் தொடர்ந்து, முதல்-அமைச்சர் பேசிய கருத்துகளை அவைக்குறிப்பில் இருந்து நீக்க வேண்டும் எனக் கோரி திமுக சட்டமன்ற உறுப்பினர்கள் இன்று சட்டசபையில் எதிர்ப்பு தெரிவித்தனர். ஆனால், முதல்-அமைச்சரின் உரையை அவைக்குறிப்பில் இருந்து நீக்க முடியாது என சபாநாயகர் ஜே.சி.டி. பிரபாகர் திட்டவட்டமாக தெரிவித்தார். சபாநாயகரின் பதிலுக்கு எதிர்ப்பு தெரிவித்து திமுக உறுப்பினர்கள் எழுந்து நின்று முழக்கங்களை எழுப்பினர். பின்னர் சபாநாயகர் இருக்கைக்கு முன்பாக அமர்ந்து தர்ணாவில் ஈடுபட்டதுடன், தொடர்ந்து கோஷங்களை எழுப்பினர். இதையடுத்து, தனது இருக்கையைச் சுற்றி நின்று முழக்கமிட்ட திமுக உறுப்பினர்களை அவைக் காவலர்களைக் கொண்டு வெளியேற்ற சபாநாயகர் உத்தரவிட்டார். உடனடியாக அவைக் காவலர்கள் உள்ளே வந்து போராட்டத்தில் ஈடுபட்ட திமுக உறுப்பினர்களில் சிலரை குண்டுக்கட்டாக தூக்கிச் சென்று வெளியேற்றினர். இதனால் சட்டசபையில் பரபரப்பு ஏற்பட்டது. இந்தச் சூழலில், சென்னை அண்ணா அறிவாலயத்தில் திமுக தலைவர் மு.க.ஸ்டாலின் செய்தியாளர்களை சந்தித்தார். அப்போது, “சட்டப்பேரவை மாண்பு கேள்விக்குள்ளாகும் வகையில் மாறிவிட்டது” என அவர் தெரிவித்தார். மேலும், 2 தொகுதிகளில் நடைபெற உள்ள இடைத்தேர்தலில் திமுக போட்டியிடுமா என செய்தியாளர்கள் கேள்வி எழுப்பினர். அதற்கு மு.க.ஸ்டாலின் பதிலளிக்காமல் காரில் புறப்பட்டுச் சென்றார்.
