குழந்தைகளுடன் ஹாலோவீன் கொண்டாட்டத்தில் பங்கேற்ற ட்ரம்ப் – மெலனியா

அமெரிக்க அதிபர் டொனால்டு ட்ரம்ப் மற்றும் அவரது மனைவி மெலனியா ட்ரம்ப் ஆகியோர் வெள்ளை மாளிகையில் நடைபெற்ற ஹாலோவீன் பண்டிகையில் குழந்தைகளுடன் உற்சாகமாகப் பங்கேற்று கொண்டாடினர். அமெரிக்காவின் வெள்ளை மாளிகை தெற்குப் புல்வெளியில் நேற்று (வியாழக்கிழமை) பாரம்பரிய ஹாலோவீன் கொண்டாட்டம் நடைபெற்றது. இதில் அதிபர் டொனால்டு ட்ரம்ப், அவரது மனைவி மெலனியா உள்ளிட்டோர் கலந்து கொண்டனர். ராணுவ வீரர்கள், சட்ட அமலாக்கத் துறையினர் மற்றும் வளர்ப்புக் குழந்தைகளைக் கொண்ட குடும்பங்களைச் சேர்ந்தவர்கள் என 6,000-க்கும் மேற்பட்ட குழந்தைகளும் பெற்றோரும் இந்த நிகழ்ச்சியில் பங்கேற்றனர். விழாவை முன்னிட்டு வெள்ளை மாளிகை வளாகம் முழுவதும் வண்ண விளக்குகள் மற்றும் பூசணிக்காய்களால் அழகுபடுத்தப்பட்டிருந்தது. அனிமேஷன் கதாபாத்திரங்கள், சூப்பர் ஹீரோக்கள், பேய்கள் எனப் பல்வேறு வேடங்களில் வந்திருந்த குழந்தைகளை ட்ரம்ப் தம்பதியினர் மகிழ்ச்சியுடன் வரவேற்றனர். அவர்களுடன் கைகுலுக்கி வாழ்த்துகளைப் பரிமாறிக்கொண்டதுடன், குழந்தைகள் கொண்டு வந்த பைகளில் சாக்லேட் மற்றும் மிட்டாய்களையும் வழங்கினர். இந்தக் கொண்டாட்டத்தின்போது, அமெரிக்க அதிபரின் புதிய 'ஏர்போர்ஸ் ஒன்' விமானம் வெள்ளை மாளிகை புல்வெளிக்கு மேலே மிகவும் தாழ்வாகப் பறந்து சென்றது. இதைப் பார்த்த குழந்தைகளும் பார்வையாளர்களும் வியப்பில் ஆழ்ந்தனர். விமானத்தைக் குழந்தைகளுக்குச் சுட்டிக்காட்டிய ட்ரம்ப், அந்த தருணத்தை மகிழ்ச்சியுடன் ரசித்தார். மேலும், இசைக்குழுவினர் 'கோஸ்ட்பஸ்டர்ஸ்' திரைப்படத்தின் பிரபலமான தீம் பாடலை இசைத்தபோது, ட்ரம்ப் தனது பாணியில் லேசாக நடனமாடி அங்கிருந்தவர்களை உற்சாகப்படுத்தினார். ட்ரம்ப் மற்றும் மெலனியாவைப் போலவே உடையணிந்து வந்திருந்த சில குழந்தைகளைக் கண்டு மகிழ்ச்சியடைந்த தம்பதியினர், அவர்களுடன் புகைப்படங்களும் எடுத்துக்கொண்டனர். அதிபராகப் பொறுப்பேற்ற பிறகு வெள்ளை மாளிகையில் ட்ரம்ப் தம்பதியினர் பங்கேற்ற இந்த ஹாலோவீன் விழா, குழந்தைகள் மற்றும் பொதுமக்களுக்கு மகிழ்ச்சியும் உற்சாகமும் நிறைந்த மறக்க முடியாத அனுபவமாக அமைந்தது.