படம் தயாராகிறது… Generating image…
தமிழ்நாடு காவல்துறையில் ஆயிரக்கணக்கான பணியிடங்கள் காலியாக உள்ள நிலையில், ஆட்சேர்ப்பு நடவடிக்கைகளை தாமதப்படுத்துவது ஏன் என தமிழக வாழ்வுரிமைக் கட்சித் தலைவர் வேல்முருகன் கேள்வி எழுப்பியுள்ளார். இதுதொடர்பாக அவர் வெளியிட்டுள்ள எக்ஸ் தளப் பதிவில் கூறியிருப்பதாவது: தமிழ்நாட்டில் பொதுமக்களின் உயிர் மற்றும் உடைமைகளுக்குப் பாதுகாப்பு அளிக்க வேண்டிய காவல்துறையில் சுமார் 15 ஆயிரம் பணியிடங்கள் காலியாக உள்ளன. காவல்துறைக்கு அனுமதிக்கப்பட்ட 1,34,667 பணியிடங்களில் தற்போது 1,18,851 பேர் மட்டுமே பணியில் உள்ளனர். அதேநேரத்தில், தேர்வுகளை நிறைவு செய்த ஆயிரக்கணக்கான தகுதியான இளைஞர்கள் பணி நியமன ஆணைக்காக காத்திருக்கின்றனர். காவல்துறைக்கு பணியாளர்கள் தேவைப்படும் நிலையில், தகுதியான இளைஞர்களும் தயாராக உள்ளனர். பணியிடங்களும் காலியாக இருக்கின்றன. இத்தகைய சூழலில், அவர்களை நியமிக்க அரசு தயக்கம் காட்டுவது ஏன் என அவர் கேள்வி எழுப்பியுள்ளார். தமிழ்நாடு சீருடைப் பணியாளர் தேர்வாணையம் மூலம் அறிவிக்கப்பட்ட 3,644 பணியிடங்களுக்கான எழுத்துத் தேர்வு மற்றும் உடற்தகுதித் தேர்வுகள் நிறைவடைந்துள்ளன. இதில் 2,833 இரண்டாம் நிலைக் காவலர்கள், 180 சிறைக் காவலர்கள், 631 தீயணைப்பாளர்கள் பணியிடங்கள் அடங்கும். ஆனால், உயரம் அளவீடு மற்றும் தமிழ்வழிக் கல்வி (PSTMS) இடஒதுக்கீடு தொடர்பான வழக்குகளை காரணமாகக் கொண்டு, உதவி ஆய்வாளர் உள்ளிட்ட அடுத்தகட்ட பணி நியமனங்கள் காலவரையின்றி தாமதமாகி வருவதாக வேல்முருகன் தெரிவித்துள்ளார். நீதிமன்ற வழக்குகளை அரசு திறம்படக் கையாண்டு விரைவாகத் தீர்வு காண வேண்டும். வழக்குகள் முடிவடையும் வரை தேர்வர்களின் வயது காத்திருக்காது என்றும், அவர்களின் குடும்பச் சூழல் மற்றும் பொருளாதாரப் பிரச்சினைகளும் காத்திருக்காது என்றும் அவர் குறிப்பிட்டுள்ளார். காவல்துறையில் பணியாளர் பற்றாக்குறை காரணமாக, ஏற்கனவே பணியில் உள்ள காவலர்கள் கூடுதல் பணிச்சுமை மற்றும் மன உளைச்சலுக்கு ஆளாகி வருகின்றனர். ரோந்து, பாதுகாப்பு, குற்றப்புலனாய்வு, நீதிமன்றப் பணிகள் உள்ளிட்ட பல்வேறு பொறுப்புகளை ஒரே காவலர் கூடுதலாகச் சுமக்க வேண்டிய நிலை தொடர்வதாகவும் அவர் கூறியுள்ளார். ஓய்வுபெற உள்ள காவலர்களின் எண்ணிக்கையை முன்கூட்டியே கணக்கிட்டு, காலியிடங்கள் ஏற்படுவதற்கு முன்பே ஆட்சேர்ப்பு நடவடிக்கைகளைத் தொடங்க வேண்டும். இதுவே தொலைநோக்குப் பார்வையுடன் செயல்படும் நிர்வாகத்தின் அணுகுமுறையாக இருக்க வேண்டும் என்றும், தற்போதைய நிர்வாகத்தின் செயல்பாடு திட்டமிடல் குறைபாட்டை வெளிப்படுத்துவதாகவும் வேல்முருகன் விமர்சித்துள்ளார். காவல்துறை பணியிடங்களை முழுமையாக நிரப்பாமல் தாமதப்படுத்துவதற்கு யார் பொறுப்பு, தேர்ச்சி பெற்ற இளைஞர்களின் பணி நியமனத்தைத் தடுத்து நிறுத்தியுள்ள சட்டச் சிக்கல்களுக்கு அரசு எடுத்துள்ள தீர்வு என்ன, ஓய்வுபெறும் காவலர்களின் எண்ணிக்கையை அடிப்படையாகக் கொண்டு தொடர்ந்து ஆட்சேர்ப்பு நடத்துவதற்கான திட்டம் உள்ளதா என்றும் அவர் கேள்வி எழுப்பியுள்ளார். மேலும், காவலர்களின் பணிச்சுமையைக் குறைத்து, குற்றத்தடுப்புப் பிரிவை வலுப்படுத்த அரசு உடனடியாக நடவடிக்கை எடுக்க வேண்டும். சட்டச் சிக்கல்களுக்கு விரைந்து தீர்வு கண்டு, தேர்ச்சி பெற்ற தகுதியான இளைஞர்களுக்கு தாமதமின்றி பணி நியமன ஆணைகளை வழங்க வேண்டும் என்றும் அவர் வலியுறுத்தியுள்ளார். இளைஞர்களின் பணி நியமனம் தாமதப்படுவதும், காவலர்கள் அதிக பணிச்சுமையில் தொடர்ந்து பணியாற்றுவதும் மக்களின் பாதுகாப்பை பாதிக்கும் எனக் குறிப்பிட்டுள்ள வேல்முருகன், நீதிமன்ற வழக்குகளை விரைந்து முடிக்க நடவடிக்கை எடுத்து, காவல்துறையில் உள்ள காலிப் பணியிடங்களை உடனடியாக நிரப்பி, மக்களின் பாதுகாப்பை உறுதி செய்ய வேண்டும் என தமிழ்நாடு அரசை கேட்டுக்கொண்டுள்ளார்.
