ஓய்வுக்கு முந்தைய நாள் கோலியுடன் பேச்சு... “கண்ணாடியில் என்னைப் பார்ப்பதுபோல் இருந்தது” - கேன் வில்லியம்சன்

சர்வதேச கிரிக்கெட்டிலிருந்து ஓய்வு பெறுவதற்கு முந்தைய நாள், இந்திய நட்சத்திர வீரர் விராட் கோலியுடன் நீண்ட நேரம் உரையாடியதாக நியூசிலாந்து அணியின் முன்னாள் கேப்டன் கேன் வில்லியம்சன் தெரிவித்துள்ளார். அந்தப் பேச்சின்போது கோலியிடம் தனது வாழ்க்கையின் பல ஒற்றுமைகளைக் கண்டதாகவும், கண்ணாடியில் தன்னையே பார்ப்பது போன்ற உணர்வு ஏற்பட்டதாகவும் அவர் குறிப்பிட்டுள்ளார். கடந்த ஜூன் மாதம் 16 ஆண்டுகால சர்வதேச கிரிக்கெட் வாழ்க்கைக்கு முற்றுப்புள்ளி வைத்து வில்லியம்சன் ஓய்வை அறிவித்தார். நியூசிலாந்து அணிக்காக அனைத்து விதமான சர்வதேசப் போட்டிகளிலும் விளையாடிய அவர், மொத்தம் 19,346 ரன்களையும் 48 சதங்களையும் 6 இரட்டைச் சதங்களையும் பதிவு செய்துள்ளார். இதன் மூலம் நியூசிலாந்து அணியின் அதிக ரன்கள் குவித்த வீரர் என்ற பெருமையுடன் சர்வதேச கிரிக்கெட்டிலிருந்து விடைபெற்றார். இந்நிலையில், பாட்காஸ்ட் நிகழ்ச்சி ஒன்றில் பங்கேற்ற அவர், ஓய்வு முடிவை எடுப்பதற்கு முந்தைய நாள் விராட் கோலியுடன் நடைபெற்ற உரையாடல் குறித்துப் பகிர்ந்துகொண்டார். இதுகுறித்து அவர் கூறுகையில், “ஓய்வு பெறுவது குறித்து முடிவெடுப்பதற்கு முன்பாக எனக்கு நெருக்கமான சிலருடன் ஆலோசித்தேன். அந்த வகையில் விராட் கோலியுடன் பேசியது மறக்க முடியாத அனுபவமாக அமைந்தது. கிரிக்கெட் வாழ்க்கையில் நாங்கள் சந்தித்த பல்வேறு அனுபவங்களைப் பற்றிப் பேசினோம். அந்த உரையாடல் எனது பிரதிபலிப்புடன் பேசுவது போன்ற உணர்வை ஏற்படுத்தியது. நீண்ட காலமாக கிரிக்கெட் விளையாடியது, அணியை வழிநடத்தியது, குடும்ப வாழ்க்கை, குழந்தைகள் என எங்கள் இருவரது வாழ்க்கையிலும் பல ஒற்றுமைகள் இருந்தன. எங்களுக்கிடையே நல்ல நட்பும் உள்ளது. அவருடன் உரையாடிய பிறகு எனது அறைக்குச் சென்றேன். அப்போது என் மனைவியிடம், ஓய்வு பெறுவதற்கு இதுதான் சரியான தருணம் என்று தெரிவித்தேன்” என்றார். டெஸ்ட் கிரிக்கெட்டில் 10,000 ரன்கள் என்ற சாதனையை நெருங்கியிருந்தபோதும் ஓய்வு பெற்றது குறித்த கேள்விக்கும் வில்லியம்சன் விளக்கமளித்தார். அந்த எண்ணிக்கையை எட்ட வேண்டும் என்பது தனது தனிப்பட்ட இலக்காக ஒருபோதும் இருந்ததில்லை என்று அவர் கூறினார். இதுபற்றி அவர் மேலும் தெரிவிக்கையில், “16 ஆண்டுகளாகத் தொடர்ந்து கிரிக்கெட் விளையாடியிருக்கிறேன். ரசிகர்களின் பாராட்டைப் பெறுவதற்காகவோ, பிறருடைய எதிர்பார்ப்புகளைப் பூர்த்தி செய்வதற்காகவோ மட்டும் ஒரு விளையாட்டில் தொடர்ந்து ஈடுபடக்கூடாது. அந்த விளையாட்டின் மீது இருக்கும் உண்மையான ஈடுபாடுதான் தொடர்ந்து விளையாடுவதற்கான உந்துதலாக இருக்க வேண்டும். டெஸ்ட் போட்டிகளில் 10,000 ரன்களை எட்ட வேண்டும் என்பதை நான் இலக்காக நிர்ணயித்ததில்லை. தொடக்கத்திலேயே அந்த எண்ணிக்கையை மனதில் வைத்து விளையாடியிருந்தால், இத்தனை ஆண்டுகள் பயணித்திருக்க முடியாது. ரன் சராசரியும் சதங்களின் எண்ணிக்கையும் மட்டுமே ஒரு வீரரின் வெற்றியை அளவிடுவதற்கான அளவுகோல்கள் அல்ல. விளையாட்டின் மீதான ஆர்வமும், அதில் கிடைக்கும் திருப்தியுமே மிகவும் முக்கியமானவை” என்றார். வில்லியம்சன் தனது டெஸ்ட் கிரிக்கெட் வாழ்க்கையில் 110 போட்டிகளில் விளையாடி 9,515 ரன்கள் எடுத்துள்ளார். இதில் 33 சதங்களும் 6 இரட்டைச் சதங்களும் அடங்கும். 10,000 ரன்கள் என்ற இலக்கை எட்டுவதற்கு இன்னும் 485 ரன்கள் மட்டுமே தேவைப்பட்ட நிலையில் அவர் ஓய்வு முடிவை அறிவித்தார். இதேபோல் இந்திய அணியின் முன்னணி வீரரான விராட் கோலியும் கடந்த 2025-ம் ஆண்டு டெஸ்ட் கிரிக்கெட்டிலிருந்து ஓய்வு பெற்றார். அவர் 123 டெஸ்ட் போட்டிகளில் விளையாடி 9,230 ரன்கள் குவித்துள்ளார். இரு முன்னணி வீரர்களுமே டெஸ்ட் போட்டிகளில் 10,000 ரன்கள் என்ற மைல்கல்லை எட்டுவதற்கு முன்பே ஓய்வு பெற்றிருப்பது குறிப்பிடத்தக்கது.