படம் தயாராகிறது… Generating image…
கள்ளக்குறிச்சி மாவட்டம் உளுந்தூர்பேட்டை அருகே அதிகாலை நேரத்தில் நிலவிய கடும் பனிமூட்டம் காரணமாக, இருசக்கர வாகனம் சாலைத் தடுப்பில் மோதி விபத்துக்குள்ளானது. இதில் பைக்கில் பயணம் செய்த 2 பேர் பலத்த காயமடைந்தனர். உளுந்தூர்பேட்டை மற்றும் அதன் சுற்றுவட்டாரப் பகுதிகளில் இன்று (புதன்கிழமை) அதிகாலை கடுமையான பனிமூட்டம் நிலவியது. இதனால் சாலையில் எதிரே வரும் வாகனங்களையும், சாலைத் தடுப்புகளையும் வாகன ஓட்டிகளால் தெளிவாகக் காண முடியாத சூழல் ஏற்பட்டது. அப்போது அந்த வழியாக இருசக்கர வாகனத்தில் சென்ற இருவர், பனிமூட்டம் காரணமாக முன்னால் இருந்த சாலைத் தடுப்பைக் கவனிக்காமல் அதன் மீது மோதினர். இந்த விபத்தில் பைக்கில் சென்ற ராஜா (29), பூமிகா (24) ஆகிய இருவரும் தூக்கி வீசப்பட்டு பலத்த காயமடைந்தனர். விபத்தைப் பார்த்த அப்பகுதி மக்கள் உடனடியாக இருவரையும் மீட்டு ஆம்புலன்ஸ் மூலம் உளுந்தூர்பேட்டை அரசு மருத்துவமனைக்கு அனுப்பி வைத்தனர். அங்கு அவர்களுக்கு மருத்துவர்கள் தீவிர சிகிச்சை அளித்து வருகின்றனர். இதற்கிடையே, அதிகாலை நேரங்களில் பனிமூட்டம் அதிகமாகக் காணப்படுவதால் வாகன ஓட்டிகள் கவனமாகச் செல்ல வேண்டும் என போக்குவரத்து போலீசார் அறிவுறுத்தியுள்ளனர். மேலும், முகப்பு விளக்குகளை எரியவிட்டபடி, வேகத்தைக் குறைத்து வாகனங்களை இயக்குமாறும் கேட்டுக்கொண்டுள்ளனர்.
