படம் தயாராகிறது… Generating image…
கள்ளக்குறிச்சி மாவட்ட பெண் கலெக்டருக்கு ஆபாசக் குறுஞ்செய்தி அனுப்பியதாகக் கூறப்படும் விவகாரத்தில், தமிழக வெற்றிக் கழக சட்டமன்ற உறுப்பினர் அருள்விக்னேஷ் மீது இதுவரை என்ன நடவடிக்கை எடுக்கப்பட்டுள்ளது என்று திராவிடர் கழகத் தலைவர் கி.வீரமணி, முதல்-அமைச்சர் விஜய்க்கு கேள்வி எழுப்பியுள்ளார். இதுதொடர்பாக அவர் வெளியிட்டுள்ள கண்டன அறிக்கையில் கூறியிருப்பதாவது: கள்ளக்குறிச்சி தொகுதி த.வெ.க. சட்டமன்ற உறுப்பினர் அருள்விக்னேஷ், அப்பகுதியின் பெண் மாவட்ட கலெக்டருக்கு ஆபாசமான குறுஞ்செய்திகளை அனுப்பியதாகவும், இரவு நேரத்தில் அவரது அதிகாரப்பூர்வ இல்லத்திற்குள் அத்துமீறி நுழைய முயன்றதாகவும் வெளியான தகவல்கள் கடும் அதிர்ச்சியையும் கண்டனத்தையும் ஏற்படுத்தியுள்ளன. இந்தச் சம்பவம் வெளியாகி ஐந்து நாட்களுக்கும் மேலாகியும், அரசு தரப்பில் இதுவரை உரிய நடவடிக்கையோ விளக்கமோ அளிக்கப்படாதது ஏமாற்றமளிக்கிறது. உயர்ந்த பொறுப்பில் இருக்கும் பெண் அதிகாரிக்கே இத்தகைய தொல்லைகள் ஏற்படுவது வேதனையானது. த.வெ.க. ஆட்சியில் மாவட்ட கலெக்டருக்கே பாதுகாப்பு இல்லையென்றால், சாதாரண பெண்களின் பாதுகாப்பு எந்த நிலையில் இருக்கும் என்ற கேள்வி எழுகிறது. பாதிக்கப்பட்ட கலெக்டர், இந்த விவகாரம் குறித்து தலைமைச் செயலாளரிடம் முறைப்படி தகவல் தெரிவித்துள்ளதாகவும், அவரது கணவரான மற்றொரு மாவட்ட கலெக்டரும் புகார் அளித்துள்ளதாகவும் செய்திகள் வெளியாகியுள்ளன. ஆனால், புகார் வந்த பிறகுதான் நடவடிக்கை எடுக்க முடியும் என்று அமைச்சர் ஒருவர் கூறுவது பொறுப்பற்ற அணுகுமுறையாகும். நாடு முழுவதும் கவனத்தை ஈர்த்துள்ள இந்த விவகாரத்தில் தொடர்புடையவர்கள் மீது தமிழக அரசு இதுவரை எடுத்துள்ள நடவடிக்கை என்ன? ரகசியமாக ஏதேனும் நடவடிக்கை மேற்கொள்ளப்பட்டுள்ளதா? அல்லது சமரசப் பேச்சுவார்த்தையுடன் பிரச்சினையை முடிக்க முயற்சி நடக்கிறதா? இதுகுறித்து முதல்-அமைச்சர் விஜய் ஏன் இதுவரை வெளிப்படையாகப் பேசவில்லை? சம்பந்தப்பட்ட எம்.எல்.ஏ.வை முதல்-அமைச்சர் அழைத்துக் கண்டித்ததாகவும், கடுமையாக எச்சரித்ததாகவும் ஊடகங்களில் செய்திகள் வெளியிடப்படுகின்றன. ஆனால், உண்மையில் என்ன நடந்தது என்பது குறித்த தெளிவான தகவல் இல்லை. ஆட்சியைத் தக்கவைக்கத் தேவையான சட்டமன்ற உறுப்பினர்களின் ஆதரவு குறைவாக இருப்பதால், கள்ளக்குறிச்சி எம்.எல்.ஏ. மீதும், பொதுமகர் ஒருவரைத் தாக்கியதாகப் புகாரில் சிக்கியுள்ள சட்டப்பேரவைத் துணைத் தலைவர் மீதும் நடவடிக்கை எடுக்கப்படாமல் இருப்பதாகக் கூறப்படுவது உண்மையா? பதவியில் நீடிப்பதற்காகக் கட்சியினர் செய்யும் தவறுகளை முதல்-அமைச்சர் சகித்துக்கொள்வாரா? எம்.எல்.ஏ.க்களை அழைத்து அவர்களின் செயல்பாடுகள் குறித்து கண்டிப்பார் என்று எதிர்பார்க்கப்பட்ட நிலையில், அனைவருக்கும் பட்டுச் சட்டை, பட்டுவேட்டி வழங்கி, தீபாவளி வாழ்த்துகளைத் தெரிவித்ததாக சட்டமன்ற உறுப்பினர்கள் கூறுகின்றனர். தவறான செயல்களில் ஈடுபட்டதாகக் குற்றச்சாட்டுக்கு உள்ளானவர்களைக் கண்டிப்பதற்குப் பதிலாக, பரிசுகள் வழங்கிப் பாராட்டுவது என்ன நியாயம்? மக்கள் பணியாற்ற வேண்டிய பொறுப்பில் இருப்பவர்களுக்கு பொதுவான ஒழுக்கமும் கட்டுப்பாடும் அவசியமில்லையா? ஒரு பெண் ஐ.ஏ.எஸ். அதிகாரிக்கே பாலியல் ரீதியான தொல்லை அளிப்பதை எப்படி அனுமதிக்க முடியும்? எதிர்க்கட்சியினரோ பொதுமக்களோ போராட்டத்தில் ஈடுபட்டால், அரசு அதிகாரிகளின் பணிக்கு இடையூறு செய்ததாக வழக்குப் பதிவு செய்யப்படுகிறது. அதே சட்டம் ஆளுங்கட்சியைச் சேர்ந்த சட்டமன்ற உறுப்பினருக்கும் பொருந்தாதா? மாவட்ட கலெக்டரின் பணிக்கு இடையூறு ஏற்படுத்த யாருக்கும் உரிமை கிடையாது. பெண்களின் பணியிடப் பாதுகாப்புக்காகச் சட்டங்கள் உள்ளன. அவற்றில் கடுமையான நடவடிக்கைகளுக்கான பிரிவுகளும் இடம்பெற்றுள்ளன. ஆளுங்கட்சியைச் சேர்ந்தவர் என்ற காரணத்திற்காக அந்தச் சட்டங்கள் செயல்படாமல் போய்விடுமா? பாலியல் குற்றச்சாட்டுகள், மோசடிகள், கொலை, திருட்டு, போதைப்பொருள் கடத்தல் உள்ளிட்ட பல்வேறு புகார்கள் ஆளுங்கட்சியினர் மீது தொடர்ந்து வெளியாகி வருகின்றன. ஆட்சியைப் பாதுகாப்பதற்காக இத்தகைய குற்றச்சாட்டுகளை அரசு புறக்கணித்தால், அதற்கு யார் பொறுப்பேற்பது? விலைவாசியைக் கட்டுப்படுத்த முடியாமலும், காவல்துறையைச் சீராகச் செயல்பட வைக்க முடியாமலும், சட்டம்-ஒழுங்கைப் பராமரிக்க முடியாமலும், சொந்தக் கட்சியினரைக் கூடக் கட்டுப்படுத்த முடியாமலும் இருப்பது ஆட்சித் திறனைப் பற்றிய கேள்விகளை எழுப்புகிறது. இதற்கிடையே, குழந்தைகள் கடத்தல் சம்பவங்களும், குறிப்பாகப் பெண் குழந்தைகள் கடத்தப்படுவது தொடர்பான செய்திகளும் தொடர்ந்து வெளியாகி வருகின்றன. கடந்த ஆட்சிக் காலத்தில் அரிதாக நிகழ்ந்த சம்பவங்களைக்கூட ஊடகங்கள் வாயிலாகப் பெரிதுபடுத்தி, பெண்களுக்குப் பாதுகாப்பு இல்லை எனக் குற்றம்சாட்டி ஆட்சிக்கு வந்தவர்கள், தற்போது தங்களது ஆட்சியில் நடைபெறும் சம்பவங்களைக் கையாளும் விதம் மக்களிடையே அதிருப்தியை ஏற்படுத்தியுள்ளது. திரைப்படங்களில் இடம்பெறும் வீரதீரக் காட்சிகளைப் போல நிஜத்திலும் செயல்படுவார்கள் என்று நம்பிய மக்களுக்கு ஏமாற்றமே மிஞ்சியுள்ளது. இந்தக் கேள்விகள் அனைத்தும் ஆட்சியாளர்களின் கவனத்திற்குச் செல்கிறதா என்றும் அவர் வினவியுள்ளார். மாவட்ட கலெக்டர் தொடர்புடைய இந்த விவகாரத்தின் தீவிரத்தைக் கருத்தில் கொண்டு, சென்னை உயர்நீதிமன்றம் தாமாக முன்வந்து (Suo Motu) வழக்குப் பதிவு செய்து விசாரணை நடத்தி உண்மைகளைக் கண்டறியலாம் என்றும் கி.வீரமணி தெரிவித்துள்ளார். பெண்கள் பாதுகாப்பு என்பது வெறும் பேச்சளவில் நின்றுவிடக் கூடாது. பள்ளிக் குழந்தைகள் முதல் முதியவர்கள் வரை அனைத்து தரப்பினரிடமும் விழிப்புணர்வை ஏற்படுத்தும் வகையில் திட்டங்களை உருவாக்க வேண்டும். அரசு இதற்கான நடவடிக்கைகளை மேற்கொள்ளாவிட்டாலும், பெரியாரின் இயக்கம் அந்தப் பணியை முன்னெடுக்கும். மேலும், பெண் மாவட்ட கலெக்டருக்கு ஆபாசக் குறுஞ்செய்தி அனுப்பப்பட்டதாகக் கூறப்படும் விவகாரத்தில் உடனடியாகவும் முறையாகவும் நடவடிக்கை எடுக்கப்படாவிட்டால், திராவிடர் கழக மகளிரணி மற்றும் திராவிட மகளிர் பாசறை சார்பில் போராட்டம் நடத்தப்படும் என்றும் தனது அறிக்கையில் கி.வீரமணி தெரிவித்துள்ளார்.
