படம் தயாராகிறது… Generating image…
தமிழக சட்டமன்றத் தேர்தலில் வெற்றி பெற்று முதல்-அமைச்சராக பொறுப்பேற்ற பிறகு, சமூக வலைதளங்களில் முதல்-அமைச்சர் விஜய்க்கான வரவேற்பு மேலும் அதிகரித்துள்ளது. குறிப்பாக, இன்ஸ்டாகிராமில் அவரை பின்தொடர்பவர்களின் எண்ணிக்கை கணிசமாக உயர்ந்துள்ளது. இன்றைய இளைஞர்கள் மற்றும் இளம் பெண்கள் மத்தியில் இன்ஸ்டாகிராம் மிகவும் பிரபலமான சமூக வலைதளமாக உள்ளது. இதில் பலர் தங்களது திறமைகளை வீடியோக்கள் மற்றும் பதிவுகள் மூலம் வெளிப்படுத்துவதோடு, அதிகமான பின்தொடர்பவர்களை பெற்று வருமானமும் ஈட்டி வருகின்றனர்.இதனுடன், அரசியல் தலைவர்கள் மற்றும் திரைப்பட நட்சத்திரங்களையும் இளைஞர்கள் அதிகளவில் பின்தொடர்ந்து வருகின்றனர். அந்த வகையில், பிரதமர் மோடியை உலகம் முழுவதும் 10.2 கோடி பேர் இன்ஸ்டாகிராமில் பின்தொடர்கிறார்கள். மத்திய உள்துறை மந்திரி அமித் ஷாவை 3.22 கோடி பேரும், மத்திய மந்திரி நிதின் கட்கரியை 66 லட்சம் பேரும் பின்தொடர்ந்து வருகின்றனர்.எதிர்க்கட்சித் தலைவர் ராகுல் காந்தியை 1.47 கோடி பேர் பின்தொடர்ந்து வரும் நிலையில், தமிழக முதல்-அமைச்சர் விஜய் அந்த எண்ணிக்கையை முந்தியுள்ளார். தற்போது விஜய்யின் இன்ஸ்டாகிராம் பின்தொடர்பவர்களின் எண்ணிக்கை 1.87 கோடியாக உயர்ந்துள்ளதாக தகவல்கள் தெரிவிக்கின்றன.மேலும், மஜ்லீஸ் கட்சித் தலைவர் ஓவைசியை 1.25 கோடி பேரும், டெல்லி முன்னாள் முதல்-மந்திரி அரவிந்த் கெஜ்ரிவால் மற்றும் பிரியங்கா காந்தி ஆகியோரை தலா 40 லட்சம் பேரும் பின்தொடர்கின்றனர். தமிழக முன்னாள் முதல்-அமைச்சரும் தி.மு.க. தலைவருமான மு.க. ஸ்டாலினை 23 லட்சம் பேர் பின்தொடர்வதாகவும் கூறப்படுகிறது.அரசியல் கட்சிகளுக்கு இன்ஸ்டாகிராம் தற்போது முக்கியமான பிரசார தளமாக உருவெடுத்துள்ளது. சமீபத்தில் டெல்லியில் நடைபெற்ற இளைஞர்கள் பங்கேற்ற பெரிய போராட்டத்திற்கான ஆதரவை கரப்பான்பூச்சி ஜனதா கட்சியினர் இன்ஸ்டாகிராம் உள்ளிட்ட சமூக வலைதளங்கள் மூலமாகவே திரட்டியதாக கூறப்படுகிறது.அதேபோல், த.வெ.க. நிர்வாகிகள் மற்றும் தொண்டர்களும் இன்ஸ்டாகிராம் வழியாக கட்சியின் நடவடிக்கைகள் மற்றும் தமிழக அரசின் திட்டங்களை பொதுமக்களிடம் தொடர்ந்து கொண்டு சேர்த்து வருகின்றனர்.சட்டமன்றத் தேர்தலில் இளைஞர்களின் ஆதரவு அதிகளவில் கிடைத்ததே விஜய் முதல்-அமைச்சராக உருவாக காரணமாக அமைந்ததாகக் கூறப்படும் நிலையில், அதே ஆதரவு இன்ஸ்டாகிராமிலும் பிரதிபலித்து, அவரை பின்தொடர்பவர்களின் எண்ணிக்கை தொடர்ந்து உயர்ந்து வருவதாக அரசியல் வட்டாரங்கள் கருதுகின்றன.
