படம் தயாராகிறது… Generating image…
இயக்குநர் நிதேஷ் திவாரி இயக்கத்தில் பிரம்மாண்டமாக உருவாகியுள்ள ‘ராமாயணா: பாகம் 1’ திரைப்படத்தைப் பார்த்த இயக்குநர் அட்லீ, அதன் காட்சியமைப்பு, தொழில்நுட்ப நேர்த்தி மற்றும் நடிகர்களின் நடிப்பைப் பாராட்டியுள்ளார். இந்தியத் திரைப்படத் துறை உலக அரங்கில் பெருமையுடன் உயர்ந்து நிற்பதற்கு இப்படம் சிறந்த அடையாளமாக இருக்கும் என்றும் அவர் தெரிவித்துள்ளார். இந்திய இதிகாசமான ராமாயணத்தை அடிப்படையாகக் கொண்டு உருவாக்கப்பட்டுள்ள இப்படத்தில் ரன்பீர் கபூர் ராமராகவும், சாய் பல்லவி சீதையாகவும் நடித்துள்ளனர். யாஷ் ராவணன் கதாபாத்திரத்திலும், சன்னி தியோல் அனுமன் வேடத்திலும் நடித்துள்ளனர். இவர்களுடன் ரவி துபே, ரகுல் பிரீத் சிங், காஜல் அகர்வால், ஷோபனா உள்ளிட்ட பலரும் முக்கிய கதாபாத்திரங்களில் இடம்பெற்றுள்ளனர். இப்படத்திற்கு ஏ.ஆர். ரகுமான் மற்றும் ஹாலிவுட் இசையமைப்பாளர் ஹான்ஸ் ஜிம்மர் இணைந்து இசையமைத்துள்ளனர். பிரம்மாண்டமான காட்சிகள், நவீன தொழில்நுட்ப அம்சங்கள் எனப் பல சிறப்புகளுடன் உருவாகியுள்ள இப்படம் ரசிகர்களிடையே அதிக எதிர்பார்ப்பை ஏற்படுத்தியுள்ளது. இந்நிலையில், ‘ராமாயணா’ திரைப்படத்தைப் பார்த்த இயக்குநர் அட்லீ, தனது பாராட்டுகளை எக்ஸ் தளத்தில் பதிவிட்டுள்ளார். அதில், இப்படம் ஒரு சாதாரண திரைப்படமாக இல்லாமல், மறக்க முடியாத அனுபவத்தைத் தருவதாகக் குறிப்பிட்டுள்ளார். படத்தின் கற்பனை வளமும், அதனைத் திரையில் காட்சிப்படுத்திய விதமும் தன்னை வியப்பில் ஆழ்த்தியதாகத் தெரிவித்துள்ளார். மேலும், இந்தியாவின் பாரம்பரியம், கலாசாரம் மற்றும் உணர்வுகளை மையமாகக் கொண்டு உருவாக்கப்பட்டுள்ள இந்தப் படைப்பு, பல தலைமுறைகளைக் கடந்து மக்களால் கொண்டாடப்படும் என நம்பிக்கை தெரிவித்துள்ளார். தனது மகன், மகளுடன் குடும்பமாக இப்படத்தை மீண்டும் பார்த்து மகிழவும், தனது தனிப்பட்ட திரைப்படச் சேகரிப்பில் இதற்கு இடமளிக்கவும் விரும்புவதாகக் கூறியுள்ளார். ரன்பீர் கபூர், யாஷ், சாய் பல்லவி, ரகுல் பிரீத் சிங், காஜல் அகர்வால், ஷோபனா உள்ளிட்ட நடிகர்களின் பங்களிப்பையும் அட்லீ வெகுவாகப் பாராட்டியுள்ளார். ஏ.ஆர். ரகுமான் மற்றும் ஹான்ஸ் ஜிம்மர் ஆகியோரின் இசை சிறப்பாக அமைந்துள்ளதாகக் குறிப்பிட்ட அவர், பிரம்மாண்டமான காட்சிகளை உருவாக்கப் பங்களித்த டி.என்.இ.ஜி. (DNEG) நிறுவனம் உள்ளிட்ட தொழில்நுட்பக் கலைஞர்களுக்கும் வாழ்த்துகளைத் தெரிவித்துள்ளார். படத்தின் தயாரிப்பாளர் நமித் மல்ஹோத்ராவின் தொலைநோக்குச் சிந்தனையையும், இயக்குநர் நிதேஷ் திவாரியின் உழைப்பு மற்றும் படைப்பாற்றலையும் பாராட்டியுள்ள அட்லீ, திரைக்கதை வடிவமைப்பில் பங்களித்த ஸ்ரீதர் ராகவனுக்கும் தனது பாராட்டுகளைத் தெரிவித்துள்ளார். இந்தியாவின் கதைகள், கலாசாரம் மற்றும் உணர்வுகளை உலக மக்கள் ரசிக்கும் வகையில் இப்படம் பிரம்மாண்டமாக உருவாக்கப்பட்டுள்ளதாகவும், இது இந்தியத் திரைப்படமாக இருந்தாலும் உலகம் முழுவதும் கொண்டாடப்படும் என்றும் அட்லீ தனது பதிவில் குறிப்பிட்டுள்ளார். படத்தின் ஒவ்வொரு அம்சமும் தனக்குப் பிடித்திருந்ததாகவும், இந்தத் திரைப்பட அனுபவம் நீண்ட காலம் தனது நினைவில் இருக்கும் என்றும் கூறியுள்ள அவர், ‘ராமாயணா’ இரண்டாம் பாகத்தைக் காண ஆவலுடன் இருப்பதாகவும் தெரிவித்துள்ளார்.
