அரிசி, பருப்பு விலை உயர்வால் மக்கள் கடுமையாக பாதிப்பு: அரசு உடனடியாக நடவடிக்கை எடுக்க வேண்டும் - அன்புமணி ராமதாஸ்

தமிழகத்தில் அரிசி, பருப்பு உள்ளிட்ட அத்தியாவசியப் பொருள்களின் விலை தொடர்ந்து அதிகரித்து வருவதால் ஏழை மற்றும் நடுத்தரக் குடும்பங்கள் கடுமையாகப் பாதிக்கப்பட்டுள்ளதாக பா.ம.க. தலைவர் அன்புமணி ராமதாஸ் தெரிவித்துள்ளார். விலைவாசி உயர்வைக் கட்டுப்படுத்த தமிழக அரசு உடனடியாக நடவடிக்கை எடுக்க வேண்டும் என்றும் அவர் வலியுறுத்தியுள்ளார். இதுதொடர்பாக அவர் வெளியிட்டுள்ள அறிக்கையில், தமிழகத்தில் அன்றாடம் பயன்படுத்தப்படும் அரிசியின் விலை கிலோவுக்கு ரூ.77 வரை உயர்ந்துள்ளதாகக் குறிப்பிட்டுள்ளார். கடந்த ஜூலை மாதத்திலிருந்து மூன்று மாதங்களுக்குள் அரிசி விலை கிலோவுக்கு ரூ.27 வரையிலும், 26 கிலோ மூட்டைக்கு ரூ.700 வரையிலும் அதிகரித்துள்ளதாக அவர் தெரிவித்துள்ளார். கடந்த ஜூலை மாதத்தில் ரூ.1,100-க்கு விற்பனை செய்யப்பட்ட 26 கிலோ சாதாரண ரக புழுங்கல் அரிசி மூட்டை தற்போது ரூ.1,800-ஆக உயர்ந்துள்ளது. இதன் மூலம் கிலோவுக்கு ரூ.42-ஆக இருந்த விலை ரூ.70-ஆக அதிகரித்துள்ளது. பொன்னி புழுங்கல் அரிசி மூட்டையின் விலை ரூ.1,400-லிருந்து ரூ.1,900-ஆகவும், ஆந்திரா மற்றும் கர்நாடக மாநிலங்களிலிருந்து விற்பனைக்கு வரும் சோனா மசூரி அரிசி மூட்டையின் விலை ரூ.1,400-லிருந்து ரூ.2,000-ஆகவும் உயர்ந்துள்ளதாக அவர் சுட்டிக்காட்டியுள்ளார். அரிசியைப் போலவே பருப்பு வகைகளின் விலையும் அதிகரித்துள்ளது. விருதுநகர் மொத்த விற்பனைச் சந்தையில் 100 கிலோ துவரம் பருப்பு மூட்டையின் விலை ரூ.13,200-லிருந்து ரூ.13,800-ஆக உயர்ந்துள்ளது. நயம் உளுத்தம்பருப்பு மூட்டை கடந்த வாரம் ரூ.9,100 முதல் ரூ.9,200 வரை விற்பனையான நிலையில், இந்த வாரம் ரூ.10,200 முதல் ரூ.10,400 வரை விற்கப்படுகிறது. இதன் விலை ஒரு வாரத்தில் ரூ.1,100 வரை அதிகரித்துள்ளதாக அன்புமணி தெரிவித்துள்ளார். சில்லறை விற்பனையில் அரிசி கிலோவுக்கு ரூ.27 வரையிலும், துவரம் பருப்பு கிலோவுக்கு ரூ.6-ம், உளுத்தம்பருப்பு கிலோவுக்கு ரூ.11-ம் விலை உயர்ந்துள்ளது. இதனால் அன்றாடத் தேவைகளுக்காக செலவிடும் ஏழை மற்றும் நடுத்தரக் குடும்பங்களின் சுமை அதிகரித்துள்ளதாக அவர் கூறியுள்ளார். அரிசி விலையைக் கட்டுப்படுத்த வலியுறுத்தி கடந்த ஜூலை 22 மற்றும் செப்டம்பர் 27 ஆகிய தேதிகளில் அறிக்கை வெளியிட்டும், தமிழக அரசு இதுவரை உரிய நடவடிக்கை எடுக்கவில்லை என்று அவர் குற்றம்சாட்டியுள்ளார். அதேநேரத்தில், அரிசி உள்ளிட்ட 11 அத்தியாவசியப் பொருள்களின் விலைகளை அரசு கண்காணித்து வருவதாகவும், அரிசி விலையில் உயர்வு ஏற்படவில்லை என்றும் உணவுத்துறை அமைச்சர் கூறியிருப்பதை அன்புமணி விமர்சித்துள்ளார். அரிசி விலை கணிசமாக உயர்ந்துள்ள சூழலில், விலை அதிகரிக்கவில்லை என்று கூறுவது மக்களின் பாதிப்புகளைப் புறக்கணிக்கும் செயலாகும் என்றும் அவர் தெரிவித்துள்ளார். எனவே, அலட்சியப் போக்கைக் கைவிட்டு, அரிசி மற்றும் பருப்பு உள்ளிட்ட அத்தியாவசியப் பொருள்களின் விலைகளைக் கட்டுப்படுத்த தமிழக அரசு விரைந்து நடவடிக்கை எடுக்க வேண்டும் என்று அன்புமணி ராமதாஸ் தனது அறிக்கையில் வலியுறுத்தியுள்ளார்.