படம் தயாராகிறது… Generating image…
தமிழகத்திற்கு தொழில் முதலீடுகளை ஈர்க்கும் நோக்கில் லண்டன் சென்றுள்ள முதல்-அமைச்சர் விஜய், நடிகர் அஜித்குமாருக்கு கார் பொம்மை ஒன்றை பரிசாக வழங்கியுள்ளார். தொழில் முதலீடுகளை ஈர்ப்பதற்காக முதல்-அமைச்சர் விஜய் கடந்த 10-ந் தேதி இரவு சென்னையில் இருந்து விமானம் மூலம் லண்டன் புறப்பட்டுச் சென்றார். மறுநாள் லண்டனை சென்றடைந்த அவர், அங்கு நடைபெறும் பல்வேறு நிகழ்ச்சிகளில் பங்கேற்று வருகிறார். இந்த பயணத்தின் ஒரு பகுதியாக நடிகர் அஜித்குமார் பங்கேற்கும் கார் பந்தய நிகழ்ச்சியும் இடம்பெற்றிருந்தது. இதையடுத்து, புகழ்பெற்ற சில்வர்ஸ்டோன் மோட்டார் பந்தய திடலுக்கு கடந்த சனிக்கிழமை சென்ற முதல்-அமைச்சர் விஜய், அஜித்குமார் பங்கேற்ற மிக்செலின் லீ மான்ஸ் கோப்பை கார் பந்தயத்தை பச்சைக் கொடியசைத்து தொடங்கி வைத்தார். கொடி அசைக்கப்பட்டதும் கார்கள் அதிவேகமாக சீறிப்பாய்ந்தன. முன்னதாக, பந்தய தொடக்க நிகழ்ச்சிக்கு விஜய் வந்தபோது, நடிகர் அஜித்குமார் புன்னகையுடன் இரு கைகளையும் கூப்பி அவரை வரவேற்றார். அஜித்தை பார்த்த விஜய், மகிழ்ச்சியுடன் அவரை நோக்கி சென்று கட்டியணைத்ததுடன், தோளில் அன்புடன் முத்தமிட்டார். அதற்கு பதிலாக அஜித்தும் விஜய்யை ஆரத்தழுவி தோளில் முத்தமிட்டு வரவேற்றார். நீண்ட இடைவெளிக்குப் பிறகு விஜய், அஜித் இருவரும் ஒரே இடத்தில் சந்தித்ததை பார்த்த ரசிகர்கள் உற்சாகமடைந்து ஆரவாரம் செய்தனர். இருவரையும் நோக்கி கையசைத்த ரசிகர்களுக்கு விஜய்யும் அஜித்தும் புன்னகையுடன் கையசைத்து பதிலளித்தனர். இந்த சந்திப்பை தொடர்ந்து, நடிகர் அஜித்குமாருக்கு முதல்-அமைச்சர் விஜய் கார் பொம்மை ஒன்றை பரிசாக வழங்கியுள்ளார். அதில், “அன்பு சகோதரர் அஜித்துக்கு, பிரியமுடன் விஜய்” என கையெழுத்திட்டு வழங்கியுள்ளார். இதேபோல், அஜித்குமாரும் விஜய்க்கு தலைக்கவசம் ஒன்றை பரிசாக அளித்துள்ளார். விஜய் மற்றும் அஜித் பரிசுகளை பரிமாறிக்கொண்டது தொடர்பான புகைப்படங்கள் தற்போது இணையத்தில் வெளியாகி வைரலாகி வருகின்றன.
