அதிமுகவில் இருந்து விலகி தவெகவில் இணைந்தது ஏன்? மரகதம் குமரவேல் விளக்கம்

அதிமுகவில் இருந்து விலகி தமிழக வெற்றிக் கழகத்தில் (தவெக) இணைந்ததற்கான காரணம் குறித்து, மதுராந்தகம் தொகுதி வேட்பாளர் மரகதம் குமரவேல் விளக்கம் அளித்துள்ளார். செங்கல்பட்டு மாவட்டம் மதுராந்தகம் சட்டப்பேரவைத் தொகுதியில் இடைத்தேர்தல் நடைபெற உள்ள நிலையில், தவெக வேட்பாளர் மரகதம் குமரவேலை ஆதரித்து முதல்-அமைச்சர் விஜய் இன்று பிரசாரம் மேற்கொண்டு வருகிறார். சென்னையில் இருந்து சாலை மார்க்கமாக மதுராந்தகம் சென்ற விஜய், பேருந்து நிலையம் அருகே அமைந்துள்ள எம்.ஜி.ஆர். சிலைக்கு மாலை அணிவித்து மரியாதை செலுத்தினார். பின்னர், அங்கிருந்து பிரசாரக் கூட்டம் நடைபெறும் இடத்துக்கு சாலைவழியாக சென்ற அவர், ஆத்தூர் அருகே திறந்தவெளி மைதானத்தில் அமைக்கப்பட்டிருந்த கூட்டரங்கத்தை அடைந்தார். தொடர்ந்து பிரசார வாகனத்துக்கு வந்த விஜய், தொண்டர்களுடன் இணைந்து தமிழ்த்தாய் வாழ்த்து பாடினார். இதையடுத்து நடைபெற்ற மதுராந்தகம் பிரசாரக் கூட்டத்தில் மரகதம் குமரவேல் பேசியதாவது: திமுகவும் அதிமுகவும் இணைந்து ஆட்சி அமைக்க முயன்றதால், தனது எம்.எல்.ஏ. பதவியை ராஜினாமா செய்துவிட்டு தவெகவில் இணைந்ததாக அவர் தெரிவித்தார். பதவியை ராஜினாமா செய்தது தொடர்பாக தன் மீது தொடர்ந்து குற்றச்சாட்டுகள் முன்வைக்கப்படுவதாகவும், தான் பிரசாரம் மேற்கொள்ளும் பகுதிகளில் திமுக, அதிமுக தரப்பினர் தன்னை விமர்சிப்பதாகவும் கூறினார். அதிமுகவில் இருந்து வெளியேறியபோது மனவேதனைக்கு ஆளானதாக குறிப்பிட்ட மரகதம் குமரவேல், தான் முன்னேறிச் செல்லும்போது தனக்கு ஆதரவாக நின்று, "நான் இருக்கிறேன்" என்று நம்பிக்கை அளித்தவர் விஜய் என்றும் தெரிவித்தார். மேலும், மதுராந்தகம் தொகுதி மக்களின் நலனையும், தொகுதியின் வளர்ச்சியையும் கருத்தில் கொண்டே தவெகவில் இணைந்ததாக அவர் கூறினார். "மதுராந்தகம் தொகுதியின் வளர்ச்சிக்கு வாக்குறுதி அளித்துள்ளேன். அதற்காகவே தவெகவில் இணைந்தேன்" என்று தெரிவித்தார். தவெக ஊழலற்ற ஆட்சியை கொள்கையாக கொண்டிருப்பதாக கூறிய அவர், அந்த கொள்கையில் உறுதியாக இருக்கும் விஜய் தனக்கு பணம் கொடுப்பார் என்ற குற்றச்சாட்டுக்கு என்ன அடிப்படை என்றும் கேள்வி எழுப்பினார். தொடர்ந்து விஜயிடம், "என்னை பார்த்துக் கொள்வீர்களோ இல்லையோ, மதுராந்தகம் தொகுதி மக்களை பார்த்துக் கொள்ளுங்கள் அண்ணா. அவர்களுக்குத் தேவையான அனைத்து வளர்ச்சித் திட்டங்களையும் செய்து கொடுக்க வேண்டும்" என மரகதம் குமரவேல் கேட்டுக்கொண்டார்.