படம் தயாராகிறது… Generating image…
திருவனந்தபுரத்தில் நேற்று முன்தினம் வெஸ்ட் இண்டீஸ் அணிக்கு எதிராக நடைபெற்ற முதல் ஒருநாள் போட்டியில் இந்திய அணி 8 விக்கெட்டுகள் வித்தியாசத்தில் வெற்றி பெற்றது. முதலில் பேட்டிங் செய்த வெஸ்ட் இண்டீஸ் 296 ரன்களை இலக்காக நிர்ணயித்த நிலையில், இந்திய அணி 41.4 ஓவர்களில் அந்த இலக்கை எட்டியது. இந்தப் போட்டியில் விராட் கோலி சிறப்பாக விளையாடி 139 ரன்கள் குவித்தார். அவரது இன்னிங்சில் 10 பவுண்டரிகள் மற்றும் 9 சிக்சர்கள் இடம்பெற்றன. இதன் மூலம் ஒருநாள் கிரிக்கெட்டில் அதிவேகமாக 15 ஆயிரம் ரன்களை கடந்த வீரர் என்ற சாதனையையும், ஒரு நாட்டில் அதிக ரன்கள் எடுத்த வீரர் என்ற சாதனையையும் அவர் படைத்தார். இந்திய மண்ணில் மட்டும் இதுவரை 7,006 ரன்களை கோலி சேர்த்துள்ளார். தனது சாதனைகள் குறித்து பேசிய விராட் கோலி, மைல்கல் சாதனைகள் மீது தான் ஒருபோதும் அதிக கவனம் செலுத்தியதில்லை என்று தெரிவித்தார். அணியின் நிலைமை மற்றும் தேவையை புரிந்து கொண்டு, களத்தில் தனக்கான பணியை சிறப்பாக செய்வதே தனது முக்கிய நோக்கம் என்றும், அதற்காக செயல்படும் போது சாதனைகள் இயல்பாகவே வந்து சேருவதாகவும் கூறினார். நீண்ட காலமாக கிரிக்கெட் விளையாடி இந்த நிலையை எட்டியிருப்பது தனக்கு மிகுந்த மகிழ்ச்சியையும் நன்றியுணர்வையும் அளிப்பதாக தெரிவித்த கோலி, தனது கிரிக்கெட் வாழ்க்கை மற்றும் கிடைத்த வாய்ப்புகளுக்காக கடவுளுக்கு நன்றி தெரிவித்தார். மேலும், தனது கிரிக்கெட் பயணத்தின் தற்போதைய கட்டத்தில் பேட்டிங்கின் வேகத்தை இன்னும் அதிகரித்து அதிரடியாக விளையாட வேண்டும் என்பதை தனக்கான சவாலாக எடுத்துக் கொண்டதாகவும் கோலி கூறினார். அதற்காக தொடர்ந்து உழைத்தது உற்சாகத்தை அளித்ததாகவும் அவர் தெரிவித்தார். வாழ்க்கையின் இந்த கட்டத்தில் தனது ஆட்டத்தில் புதிய பரிமாணத்தை வெளிப்படுத்துவது பரவசமான அனுபவமாக இருப்பதாகவும், இந்திய அணிக்காகவோ அல்லது ஐ.பி.எல். அணிக்காகவோ விளையாடும் போதும் மனதளவில் சுதந்திரமாக செயல்பட இது உதவுவதாகவும் கோலி குறிப்பிட்டார். அந்த மனநிலை தனது சிறப்பான ஆட்டத்துக்கும் துணையாக இருப்பதாக அவர் கூறினார்.
