படம் தயாராகிறது… Generating image…
தமிழகத்தில் செயல்பட்டு வரும் டாஸ்மாக் மதுக்கடைகளுக்கு அக்டோபர் 1-ம் தேதி முதல், கடை அமைந்துள்ள பகுதியின் அடிப்படையில் மாதந்தோறும் பராமரிப்பு தொகை வழங்கப்பட உள்ளது. இதன்படி, மாநகராட்சி பகுதிகளில் உள்ள மதுக்கடைகளுக்கு மாதம் ரூ.5,000, நகராட்சி மற்றும் பேரூராட்சி பகுதிகளில் செயல்படும் கடைகளுக்கு ரூ.4,000, ஊரகப் பகுதிகளில் உள்ள கடைகளுக்கு ரூ.3,000 என பராமரிப்பு தொகை நிர்ணயிக்கப்பட்டுள்ளது. டாஸ்மாக் கடைகளில் மதுபாட்டில்களுக்கு நிர்ணயிக்கப்பட்ட விலையைவிட கூடுதலாக ரூ.10 வசூலிக்கப்படுவதைத் தடுக்கும் நோக்கில் இந்த தொகை வழங்கப்படுவதாக தெரிவிக்கப்பட்டுள்ளது. மதுக்கடைகளை தினமும் சுத்தம் செய்வது, துப்புரவு பணியாளரை நியமிப்பது உள்ளிட்ட பராமரிப்பு பணிகளுக்கு மட்டுமே இந்த தொகையை பயன்படுத்த வேண்டும் என அறிவுறுத்தப்பட்டுள்ளது. அதேநேரத்தில், மின்சார கட்டணம் செலுத்துதல், கட்டிடங்களை பழுதுபார்த்தல் உள்ளிட்ட பணிகளுக்கோ அல்லது வேறு தேவைகளுக்கோ பராமரிப்பு தொகையை பயன்படுத்தக் கூடாது என டாஸ்மாக் நிறுவனம் தெரிவித்துள்ளது. அக்டோபர் மாதத்துக்கான பராமரிப்பு தொகை, செப்டம்பர் மாத சம்பளத்துடன் டாஸ்மாக் பணியாளர்களுக்கு வழங்கப்படும் என்றும் அறிவிக்கப்பட்டுள்ளது.
