படம் தயாராகிறது… Generating image…
18-வது பிரிக்ஸ் உச்சி மாநாட்டில் பங்கேற்பதற்காக சீன அதிபர் ஜி ஜின்பிங் டெல்லி வந்தடைந்தார். அவருடன் சீன கம்யூனிஸ்டு கட்சியின் அரசியல் தலைமைக் குழு நிலைக்குழு உறுப்பினரும், கட்சியின் மத்திய குழு அலுவலக இயக்குனருமான காய் கி, சீன வெளியுறவு மந்திரியும், கம்யூனிஸ்டு கட்சியின் அரசியல் தலைமைக் குழு உறுப்பினருமான வாங் யி உள்ளிட்ட உயரதிகாரிகளும் வந்துள்ளனர். டெல்லி விமான நிலையம் வந்த ஜி ஜின்பிங்கிற்கு இந்திய பாரம்பரிய கலாச்சார முறைப்படி உற்சாக வரவேற்பு அளிக்கப்பட்டது. இதனைத் தொடர்ந்து அவர் இன்று மாலை 5.45 மணிக்கு பிரதமர் மோடியை சந்தித்து பேச்சுவார்த்தை நடத்த உள்ளார். 7 ஆண்டுகளுக்குப் பிறகு இந்திய பயணம் ஜி ஜின்பிங் சுமார் 7 ஆண்டுகளுக்குப் பிறகு இந்தியா வந்துள்ளார். அவர் கடைசியாக 2019-ம் ஆண்டு சென்னையை அடுத்த மாமல்லபுரத்தில் பிரதமர் மோடியுடன் நடைபெற்ற முறைசாரா உச்சி மாநாட்டில் பங்கேற்றார். இதற்கு முன்பு 2016-ம் ஆண்டு கோவாவில் நடைபெற்ற பிரிக்ஸ் மாநாட்டிலும், 2014-ம் ஆண்டு செப்டம்பர் மாதம் தனது முதல் இந்தியப் பயணத்தின்போதும் ஜின்பிங் இந்தியா வந்திருந்தார். இந்தியா-சீனா உறவில் எதிர்பார்ப்பு 2020-ம் ஆண்டு கிழக்கு லடாக் பகுதியில் ஏற்பட்ட மோதலைத் தொடர்ந்து இந்தியா-சீனா இடையிலான உறவில் நீண்ட காலமாக பதற்றம் நீடித்து வந்தது. தற்போது இரு நாடுகளும் அந்த நிலையைத் தணித்து, உறவுகளை மீண்டும் இயல்பான பாதைக்கு கொண்டு வருவதற்கான முயற்சிகளை மேற்கொண்டு வருகின்றன. ஜின்பிங்கின் இந்திய வருகைக்கு முன்னதாக, தேசிய பாதுகாப்பு ஆலோசகர் அஜித் தோவல் மற்றும் சீன வெளியுறவு மந்திரி வாங் யி ஆகியோர் கடந்த மாதம் பெய்ஜிங்கில் எல்லைப் பிரச்சினை தொடர்பாக விரிவான பேச்சுவார்த்தை நடத்தினர். மேலும், ஆகஸ்டு 25-ம் தேதி பெய்ஜிங்கில் நடைபெற்ற 25-வது சுற்று சிறப்பு பிரதிநிதிகள் பேச்சுவார்த்தையில் இரு நாடுகளும் 8 அம்ச ஒருமித்த முடிவை எட்டின. எல்லை வரையறை மற்றும் எல்லை நிர்வாகம் தொடர்பான பேச்சுவார்த்தைகளை விரைவுபடுத்தவும் இரு தரப்பும் ஒப்புக்கொண்டன. இந்தச் சூழலில், பிரிக்ஸ் மாநாட்டையொட்டி நடைபெறும் மோடி-ஜின்பிங் சந்திப்பு, இந்தியா-சீனா உறவுகளின் அடுத்தகட்ட நகர்வுகள் குறித்து முக்கியத்துவம் பெற்றுள்ளது. இந்தியா-சீனா உறவுகளை நீண்டகால மற்றும் தொலைநோக்கு அடிப்படையில் கையாளவும், இரு நாடுகளுக்கும் இடையிலான தகவல் தொடர்பை அதிகரிக்கவும், ஒத்துழைப்பை விரிவுபடுத்தவும் சீனா தயாராக இருப்பதாக அந்நாட்டு வெளியுறவு அமைச்சக செய்தித் தொடர்பாளர் மாவோ நிங் தெரிவித்துள்ளார்.
