படம் தயாராகிறது… Generating image…
தலைமை தேர்தல் ஆணையர் ஞானேஷ் குமார் 48 மணி நேரத்துக்குள் பதவி விலக வேண்டும் என்றும், அவ்வாறு செய்யாவிட்டால் நாடு முழுவதும் போராட்டம் நடத்தப்படும் என்றும் கரப்பான் பூச்சி ஜனதா கட்சி எச்சரிக்கை விடுத்துள்ளது. தேர்தல் ஆணையத்தின் செயல்பாடுகள் மற்றும் அங்கு நிலவும் கருத்து வேறுபாடுகள் தொடர்பாக ஆங்கில நாளிதழ் ஒன்றில் வெளியான விசாரணை அறிக்கையைத் தொடர்ந்து, டெல்லியில் கரப்பான் பூச்சி ஜனதா கட்சி சார்பில் செய்தியாளர் சந்திப்பு நடைபெற்றது. அப்போது கட்சியின் நிறுவனர் மற்றும் ஒருங்கிணைப்பாளர் அபிஜீத் திப்கே, “தலைமை தேர்தல் ஆணையர் ஞானேஷ் குமார் 48 மணி நேரத்துக்குள் ராஜினாமா செய்ய வேண்டும். இல்லையெனில் டெல்லியில் மட்டுமின்றி நாடு முழுவதும் தர்ணா போராட்டம் நடத்தப்படும்” என்று தெரிவித்தார். கட்சியின் இணை ஒருங்கிணைப்பாளர் சவுரவ் தாஸ், மூன்று முக்கிய கோரிக்கைகளை முன்வைத்தார். அதன்படி, தலைமை தேர்தல் ஆணையர் பதவி விலக வேண்டும் என்றும், அவருக்கு எதிராகவும், அவருக்கு உத்தரவிட்டதாகக் கூறப்படும் நபர்களுக்கு எதிராகவும் குற்றவியல் நடவடிக்கை எடுக்க வேண்டும் என்றும் வலியுறுத்தினார். மேலும், நடைபெறவுள்ள அனைத்து சட்டசபை தேர்தல்களையும் தற்காலிகமாக நிறுத்த வேண்டும் என்றும் கோரிக்கை விடுத்தார். இதனுடன், வாக்காளர் பட்டியலுக்கான சிறப்பு தீவிர திருத்தப் பணியை 2025-ம் ஆண்டின் நிலைக்கு மீண்டும் கொண்டு வர வேண்டும் என்றும், அது தொடர்பான ஆவணங்களை சுப்ரீம் கோர்ட்டு தலைமையிலான குழுவின் பாதுகாப்பில் ஒப்படைக்க வேண்டும் என்றும் கட்சி கோரியுள்ளது. தேர்தல் ஆணையர்களை நியமிப்பது தொடர்பான சட்டத்தையும் ரத்து செய்ய வேண்டும் என வலியுறுத்தப்பட்டுள்ளது. இதற்கிடையில், தேர்தல் ஆணையத்தில் கடந்த 10 மாதங்களில் குறைந்தது 14 முறை தேர்தல் ஆணையர்கள் சுக்பீர் சிங் சந்து மற்றும் விவேக் ஜோஷி ஆகியோர் சில முடிவுகள் மற்றும் நடவடிக்கைகளுக்கு எதிர்ப்பு தெரிவித்ததாக ‘இந்தியன் எக்ஸ்பிரஸ்’ செய்தி வெளியிட்டிருந்தது. குறிப்பாக, வாக்காளர்களை சேர்த்தல், நீக்குதல் மற்றும் மீண்டும் சேர்த்தல், வாக்காளர் பதிவு நடைமுறைகளில் மாற்றங்கள், வாக்காளர் பட்டியலின் சிறப்பு தீவிர திருத்தம் உள்ளிட்ட விவகாரங்களில் அவர்கள் ஆட்சேபனைகளை பதிவு செய்ததாக அந்த செய்தியில் குறிப்பிடப்பட்டது. ஆனால், இந்த தகவல்களை தேர்தல் ஆணையம் மறுத்துள்ளது. ஆலோசனைகளின்போது மாறுபட்ட கருத்துகள் மற்றும் எழுத்துப்பூர்வமான கருத்துகளை தெரிவிப்பது வழக்கமான நடைமுறை என்றும், கடந்த ஓராண்டில் எடுக்கப்பட்ட அனைத்து முக்கிய முடிவுகளும் மூன்று தேர்தல் ஆணையர்களின் ஒருமித்த ஒப்புதலுடனேயே எடுக்கப்பட்டதாகவும் தேர்தல் ஆணையம் தெரிவித்துள்ளது.
